Այսօր՝ մարտի 16-ին, Ստեփանակերտի Մշակույթի և երիտասարդության պալատում Արցախի Հանրապետության Կրթության, գիտության, մշակույթի և սպորտի նախարարության աշխատակազմի Նախազորակոչային պատրաստության և արտադպրոցական ծրագրերի վարչության արտադպրոցական ծրագրերի բաժնի կողմից Ստեփանակերտի և շրջանների մանկապատանեկան ստեղծագործական կենտրոնների միջև ձեռքի աշխատանքների ցուցահանդես-մրցույթ է կազմակերպվել` նվիրված կանանց միամսյակին:
Մայրաքաղաքում ձեռքի աշխատանքների ցուցահանդես-մրցույթ է կազմակերպվել (լուսանկարներ)
ՍՏԵՓԱՆԱԿԵՐՏ, 16 մարտի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ մրցույթի նպատակն էր նպաստել աշակերտների գեղագիտական դաստիարակությանը և ստեղծագործական ունակությունների զարգացմանը, աջակցել գործնական հմտությունների ձեռքբերմանը, ինչպես նաև ամրապնդել Ստեփանակերտի և շրջանների մանկապատանեկան ստեղծագործական կենտրոնների միջև կապը:
Ցուցահանդեսին ներկայացվել են անսահմանափակ քանակով ձեռքի աշխատանքներ՝ «գորգագործություն», «գոբելեն», «խեցեգործություն», «հուլունքագործություն», «նկարչություն», «քանդակ» և այլ ճյուղերից, որոնք խորհրդանշում էին Մայրության և գեղեցկության խորհուրդը: Բոլոր ՄՊՍԿ-ների ներկայացրած աշխատանքներին ծանոթանալուց հետո մրցույթի հանձնաժողովի անդամները որոշել են հաղթողներին: Մրցանակային առաջին տեղն է գրավել Ասկերանի Մանկապատանեկան ստեղծագործական կենտրոնը,երկրորդ տեղում Ստեփանակերտի, իսկ երրորդ տեղում՝ Մարտակերտի ՄՊՍԿ-ներն էին:
Հանձնաժողովի նախագահ, ԱՀ ԿԳՄՍ նախարարի խորհրդական Մելանյա Բալայանը մեզ հետ զրույցում համոզմունք է հայտնել, որ նմանատիպ միջոցառումներն այսուհետ հաճախակի կկազմակերպվեն:
«Այսօր՝ այս բարդ իրավիճակում, մենք այստեղ՝ մեր հայրենիքում ապրելովու արարելով նորից փորձում ենք ապացուցել, որ մեր ժողովուրդը հավերժ է, իսկ մեր պայքարը դեռ շարունակվում է: Յուրաքանչյուրս յուրովի ենք պայքարում մեր հայրենիքի համար: Այսօրվա ցուցահանդեսին ներկայացված աշխատանքները սաների աշխատանքի սկիզբն են ազդարարում, և ես նրանց մաղթում եմ ստեղծագործական նոր բարձունքներ: Տա Աստված, որ նրանք հնարավորություն ունենան մեր հայրենիքի խաղաղ երկնքի տակ շատ ավելի լավ պայմաններում ստեղծագործել, և մեր հայրենիքի պատմությունը, արվեստը, մշակույթը աշխարհին մատուցել»,-նշել է Մ. Բալայանը:
Մրցանակային 1-ին տեղ գրաված Ասկերանի ՄՊՍԿ կենտրոնի տնօրեն Նարինե Պետրոսյանի տեղեկացրեց, որ կենտրոն է հաճախում 378 սան, գործում ՝ 16 անուն խմբակ:
«Ըստ նախատեսված ծրագրի` ներկայացրել ենք աշխատանքներ հիմնականում նկարչությունից, գոբելենից, կարպետագործությունից, գորգագործությունից՝ Մայրության և գեղեցկության տոնի թեմատիկայով: Մենք փորձել ենք այսօր ներկայացնել ինչպես ազգայինը, մեր հայկականը բնորոշող, այնպես էլ՝ 21-րդ դարին համապատասխան գործեր: Կարծում եմ՝ հանձնաժողովը մեր աշխատանքը գնահատել է` հաշվի առնելով այդ ամենը: Պետք է նշեմ, որ արդյունքը թիմային աշխատանքի արգասիք է, բոլոր խմբակավարները երեխաների հետ մեծ նվիրումով են աշխատել, և այսօր դրա արդյունքը երևաց։ Առաջին պատվավոր տեղը զբաղեցնելը որքան ոգևորող, նույնքան էլ պարտավորեցնող է: Այսօր մենք մեզ վրա նոր պարտավորություն վերցրեցինք ավելի կատարելագործվելու և ավելի լավ աշխատանքներ ներկայացնելու»,-ասել է Ն.Պետրոսյանը` հավելելով, որ կենտրոնն ունի մասնաճյուղեր շրջանի տասը համայնքներում:
Ցուցահանդես-մրցույթի բոլոր մասնակիցները պարգևատրվել են պատվոգրերով, հաղթող ճանաչված ՄՊՍԿ-ները արժանացել են նախարարության դիպլոմների և խրախուսական նվերների: