«100 օր. Շրջափակված Արցախ». Ստեփանակերտում հանրահավաք է տեղի ունեցել
Այսօր՝ մարտի 21-ին, Ստեփանակերտի Վերածննդի հրապարակում Հայ հեղափոխական դաշնակցության Արցախի երիտասարդաց միության նախաձեռնությամբ և Արցախում գործող երիտասարդական ու հասարակական կազմակերպությունների մասնակցությամբ տեղի է ունեցել հանրահավաք՝ «100 օր. Շրջափակված Արցախ» խորագրով:
«100 օր. Շրջափակված Արցախ». Ստեփանակերտում հանրահավաք է տեղի ունեցել
ՍՏԵՓԱՆԱԿԵՐՏ, 21 մարտի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ հավաքի նպատակն էր արցախցու ձայնը աշխարհին լսելի դարձնելը, նրա պայքարի վճռականությունն արտահայտելն ու հայ ժողովրդի միասնական կամքն ապացուցելը:
Հանրահավաքը մեկնարկել է բոլոր ժամանակներում Արցախի պաշտպանության համար նահատակված քաջորդիների հիշատակը խնկարկելով:
«Այսօր բոլորիս համախմբել է մեկ նպատակ և մեկ գաղափար՝ Արցախում ապրելու հաստատակամությունն և վճռականությունը: Արդեն 100 օր է, ինչ Արցախը միջազգային հանրության անպտուղ մտահոգությունների և հայտարարությունների ներքո գտնվում է Ադրբեջանի կողմից արհեստականորեն ստեղծված շրջափակման մեջ:100 օրն ինքնին ոչ մի խորհուրդ չունի, բայց մի ամբողջական և լուրջ ժամանակահատված է` վերլուծելու այս ընթացքում արցախցու ապրած կյանքը և մեր կրած դժվարությունները: Մենք կրեցինք և շարունակում ենք կրել կենցաղային շատ դժվարություններ, բայց, սրան զուգահեռ, բացահայտեցինք մեր մեջ թաքնված շատ որակներ՝ համբերություն, ներողամտություն, եղբայրասիրություն, մարդկային պարզ շփումներ, որոնցից շատ էինք հեռացել: Եվ, հակառակ այս շրջափակումը ստեղծողների ցանկությանը, մենք շարունակում ենք կառչած մնալ մեր հողին»,-ելույթի իր խոսքում ասել է Հայ առաքելական եկեղեցու Արցախի թեմի քրիստոնեական դաստիարակության կենտրոնի տնօրեն տեր Վաչագան քահանա Գյուրջյանը:
ՀՅԴ Արցախի երիտասարդական միության անդամ Հեղինար Գրիգորյանն իր խոսքում նշել է, որ շրջափակման մեջ պայքարի 100-րդ օրն է:
«Այս պայքարը սկսել են մեր հայրերը` 1988 թվականին: 35 տարի առաջ մեր ժողովուրդը կանգնած էր կենսական մի հարցի առջև, որը մինչ այդ, կարծեք, գոյություն էլ չուներ: Այդ ժամանակ պայքարի անհրաժեշտության գիտակցումը միասնական նպատակի շուրջ համախմբեց ողջ հայությանը՝ ձևավորելով համազգային շարժում, որը հետագայում ստացավ Արցախյան շարժում անվանումը: 35 տարի անց հայտնվել ենք նույն իրավիճակում, ցեղասպան թշնամին փորձում է հասնել Արցախի ամբողջական հայաթափմանը, Հայաստանի վերջնական կործանմանը: Արցախի անկումը կբացի դարպասները դեպի Հայաստան, և հայությունը կկորցնի այն միջնաբերդը, այն վահանը, որ 35 տարի շարունակ պաշտպանում է Հայաստանը: Հայրենիքի ողբերգական կորուստների հետևանքով մեր ժողովուրդը հայտնվել է հուսահատական անկման մեջ: Անորոշության այս լաբիրինթոսում հայտնված ժողովուրդը պետք է վերագտնի իր մեջ պայքարելու կամքը, պետք է հասկանա, որ Հայաստանն ու Արցախը կարող են գոյատևել մայն միասնաբար, ձեռք ձեռքի տված»,-ասել է Հ. Գրիգորյանը:
Հանրահավաքի ընթացքում երիտասարդները ռուսերենով և անգլերենով կոչեր են հղել միջազգային հանրությանը: