Արցախի Հանրապետության Մարտակերտի շրջանի Չլդրան համայնքի Տիգրան Իզմիրլյանի անվան դպրոցում 70 աշակերտ է սովորում։
Նոր շենքային պայմանները դասապրոցեսը լիարժեք կազմակերպելու հնարավորություն են ընձեռնում. Չլդրանի դպրոցի տնօրենը ներկայացնում է կրթօջախի առօրյան
ՍՏԵՓԱՆԱԿԵՐՏ, 28 մարտի, ԱՐՑԱԽՊՐԵՍ։ Այս մասին «Արցախպրես»-ի թղթակցի հետ զրույցում ասել է դպրոցի տնօրեն Սամվել Ղուկասյանը:
«Աշակերտների քանակով պայմանավորված` դասարաններ կան, որոնք միացյալ են պարապմունքներն անցկացնում: Այս ուսումնական տարում 12-րդ դասարանում 3 աշակերտ է սովորում, 8-ն էլ՝ 9-րդ դասարանում: Կրթօջախում նաև նախադպրոցական խումբ է գործում, որտեղ հաճախում է 12 սան: Գյուղը մանկապարտեզ չունի։ Այդ առումով նախադպրոցական խմբի պարապմունքները շատ կարևոր են։ Ուսուցիչներն էլ հիմնականում երիտասարդ մասնագետներ են»,-նշել է Ս. Ղուկասյանը:
Մեր զրուցակիցը տեղեկացրել է, որ դպրոցի շենքը կառուցվել է 2002թվականին, ժնևահայ բարերար Տիգրան Իզմիրլյանի ֆինանսավորմամբ, և կրում է նրա անունը:
««Հայաստան» համահայկական հիմնադրամը, «Իզմիրլյան» հիմնադրամը և Արցախի կառավարությունը ստանձնել են համատեղ ջանքերով դպրոցական շենքի վերանորոգման, կցակառույց երկհարկանի մասնաշենքի կառուցման աշխատանքները: Արդյունքում առաջին հարկում ունեցանք ընդարձակ, լուսավոր դահլիճ, երեք մեծ դասասենյակ, սանհանգույց, իսկ երկրորդ հարկում` ևս երկու դասասենյակ` նոր հնարավորություններ ստեղծելով դասապրոցեսը լիարժեք կազմակերպելու համար: Դպրոցական միջոցառումներն արդեն անց ենք կացնում նոր կառուցված դահլիճում, այլ ոչ թե բակում: «Իզմիրլյան» հիմնադրամի կողմից դպրոցին տրամադրվել է նաև անհրաժեշտ գույք, որի մի մասը, Արցախի շրջափակմամբ պայմանավորած, դեռ տեղ չի հասել: Փոխվել են պատուհանները, դռները, կատարվել ներքին հարդարման աշխատանքներ, երրորդ հարկի հատակը սալիկապատվել է, նոր կաթսա և ջեռուցման նոր մարտկոցներ են տեղադրվել»,-մանրամասնել է կրթօջախի տնօրենը` իրազեկելով նաև, որ շենքային նոր պայմանների շնորհիվ դպրոցի` Լևոն Ադյանի անունը կրող գրադարանը ևս գործում է լայն ու հարմարավետ սենյակում:
Ս. Ղուկասյանի խոսքով` դպրոցի աշակերտները ամեն տարի մասնակցում են առարկայական օլիմպիադաների և բարձր ցուցանիշներ արձանագրում:
Իսկ որպես խնդիրներ` նա առանձնացրել է դպրոցի սպորտդահլիճ չունենալն ու լաբորատորիայի ժամանակակից սարքավորումներով հագեցած չլինելը։
