Սերբիայի մայրաքաղաք Բելգրադում անցկացվող ազատ ոճի ըմբշամարտի աշխարհի առաջնությունում Արսեն Հարությունյանը (57կգ) բրոնզե մեդալի համար պայքարելու հնարավորություն է ստացել։
ԱԱ․ Արսեն Հարությունյանի գեղեցիկ հաղթանակը՝ 10:0
ՍՏԵՓԱՆԱԿԵՐՏ, 18 սեպտեմբերի, ԱՐՑԱԽՊՐԵՍ: Նա սփոփիչ գոտեմարտում 10:0 հաշվով հաղթել է չինացի Վանհաո Ժոուին եւ կանցկացնի բրոնզե մեդալի գոտեմարտ Ղազախստանի ներկայացուցիչ Մեյրամբեկ Կարթբայի հետ։
57 կգ-ն օլիմպիական քաշային կարգ է եւ բրոնզե մեդալ նվաճելու դեպքում Արսեն Հարությունյանը կնվաճի օլիմպիական ուղեգիր: Բրոնզե մեդալի գոտեմարտում պարտվելուց հետո էլ եւս մեկ գոտեմարտի հնարավորություն կստանան պարտված ըմբիշները օլիմպիական ուղեգրի համար:
Հայաստանի հավաքանի առաջատարը պայքարը սկսել էր որակավորման փուլից, որտեղ 14:3 հաշվով էլ հաղթել էր Եվրոպայի բրոնզե մեդալակիր, Ուկրաինայի ներկայացուցիչ Կամիլ Կերիմովին։
1/16 եզրափակիչում ժամանակից շուտ 14:2 հաշվով տպավորիչ հաղթել էր Իտալիայի ներկայացուցիչ Սիմոնե Պիրոդուին։
1/8 եզրափակիչում 11:0 հաշվով ժամանակից շուտ պարտության էր մատնել Հյուսիսային Մակեդոնիայի ներկայացուցիչ Վլադիմիր Եգորովին։
Քառորդ եզրափակիչում համառ պայքարում Հարությունյանը 14:16 հաշվով պարտվել էր Ռիոյի Օլիմպիական խաղերի փոխչեմպիոն, աշխարհի չեմպիոն, Ասիայի չեմպիոն ճապոնացի Ռեյ Հիգուչիին:
Հիշեցնենք, որ աշխարհի առաջնությունը ըմբիշների առաջին օլիմպիական վարկանիշային մրցաշարն է: Յուրաքանչյուր օլիմպիական քաշային կարգում խաղարկվելու է 5 ուղեգիր: 4 մեդալակիրները և բրոնզե մեդալի համար գոտեմարտում պարտված 2 ըմբիշներից մեկը. նրանց միջև կանցկացվի լրացուցիչ գոտեմարտ:
Ազատ ոճի ըմբշամարտի օլիմպիական քաշային կարգերն են` 57 կգ, 65 կգ, 74 կգ, 86 կգ, 97 կգ եւ 125 կգ:
Ազատ ոճի ըմբշամարտի աշխարհի առաջնությունը կավարտվի սեպտեմբերի 19-ին:
