Բաքուն Երևանից պահանջում է չմեծացնել ռազմական ներուժը, լուծարել Արցախի պետական կառույցները:
Բաքուն Երևանից պահանջում է չմեծացնել ռազմական ներուժը, լուծարել Արցախի պետական կառույցները
ՍՏԵՓԱՆԱԿԵՐՏ, 18 սեպտեմբերի, ԱՐՑԱԽՊՐԵՍ։ Azatutyun.am-ի փոխանցմամբ, այս մասին ասվում է Ադրբեջանի արտգործնախարարության տարածած հաղորդագրությունում։
«Հայաստանից պահանջում ենք դադարեցնել մեծացնել ռազմական ներուժը, ձեռնպահ մնալ ռևանշիստական ծրագրերից, չխախտել և կասկածի տակ չդնել Ադրբեջանի տարածքային ամբողջականությունն ու ինքնիշխանությունը, դադարեցնել անջատողականության և ահաբեկչության հովանավորումը Ադրբեջանի Ղարաբաղի տարածաշրջանում։ Պահանջում ենք նաև անհապաղ դուրս բերել հայ զինվորականներին, լուծարել Հայաստանին ենթակա խամաճիկ ռեժիմի ռազմական և այսպես կոչված «կառավարական» կառույցները, զինաթափել Ադրբեջանի տարածքում անօրինական կերպով տեղակայված հայկական բոլոր զինված ուժերին»,- հայտարարել է պաշտոնական Բաքուն՝ հավելելով, որ «այդ դեպքում ապօրինի ռեժիմի, այսպես կոչված, «ներկայացուցիչների» նկատմամբ կարող է կիրառվել համաներում։
Ադրբեջանի արտգործնախարարության մամլո ծառայության համաձայն՝ այսօր ԱԳՆ-ում հանդիպում է կայացել այդ երկրում հավատարմագրված դիվանագետների և Ալիևի վարչակազմի, այդ թվում՝ Ադրբեջանի նախագահի աշխատակազմի ներկայացուցիչների, արտգործնախարարի տեղակալի միջև։
Հանդիպման արդյունքների վերաբերյալ տարածած հաղորդագրության համաձայն՝ ադրբեջանցի պաշտոնյաները օտարերկրյա դիվանագետներին դժգոհել են հայկական կողմի «ապակառուցողական քայլերից», հումանիտար ճգնաժամը «քաղաքականացնելու» փորձերից, հերթական անգամ հայտարարել, որ Լեռնային Ղարաբաղի շրջափակման մասին պնդումները իրականությանը չեն համապատասխանում։
Հաղորդագրությունում անդրադարձ կա նաև ԱՄՆ Սենատի արտաքին հարաբերությունների հանձնաժողովում անցած շաբաթ տեղի ունեցած լսումներին, որը ադրբեջանցի պաշտոնյաները «բեմադրություն» են որակել։ «Ցավում ենք, որ Պետքարտուղարության ներկայացուցիչը միացել է միակողմանի հակաադրբեջանական հայտարարություններին»,- ասված է Ադրբեջանի ԱԳՆ-ի հաղորդագրությունում:
