Ռուսաստանի Դաշնությունում ռուսերեն լեզվով լույս է տեսել արցախցի արձակագիր, լրագրող Աշոտ Բեգլարյանի «Ղարաբաղյան օրագիր» փաստագրական գիրքը, որտեղ հեղինակը հավաքագրել է 1992-1994 թթ. ադրբեջանաղարաբաղյան պատերազմին և հետպատերազմական շրջանին վերաբերող փաստերով հիմնավորված նյութեր՝ հուշեր, նամակներ, տպավորություններ ու մի շարք հոդվածներ, որոնց օգնությամբ սիրո, ընկերության, պատերազմական՝ արյան և կրակի միջոցով խաղաղության հաստատման ճիգերի և այլ մարդկային բարձր արժեքների թեմաներին անդրադառնալով` գիրքն ընթերցողին հնարավորություն է տալիս ոչ միայն վերապրել անցած տարիներին տեղի ունեցած ահարկու դեպքերը, այլև սթափ գնահատական տալ Արցախի Հանրապետության կայացման և պետականաշինության գործընթացի զարգացումներին:
Կայացավ «Ղարաբաղյան օրագիր» փաստագրական գրքի արցախյան շնորհանդեսը
ՍՏԵՓԱՆԱԿԵՐՏ, ՀՈՒՆԻՍԻ 29, ԱՐՑԱԽՊՐԵՍ: Գիրքը հրատարակվել է Ռուսաստանում լույս տեսնող «Ժամ» ամսագրի գլխավոր խմբագիր Աննա Գիվարգիզյանի նախաձեռնությամբ:
Այսօր, Ստեփանակերտի «Մեսրոպ Մաշտոց» համալսարանի դահլիճում կայացավ Աշոտ Բեգլարյանի «Ղարաբաղյան օրագիր» գրքի արցախյան շնորհանդեսը:
Նշենք, որ մինչ այս, գրքի շնորհանդեսներ են կայացել նաև Մոսկվայում ու Երևանում: Միջոցառմանը շնորհավորանքի ու բացման խոսքով հանդես է եկել բուհի ռեկտոր Դոնարա Գաբրիելյանը:
Խոսելով գրքի կարևորության ու սպասված լինելու մասին` բանաստեղծ, գրականագետ Սոկրատ Խանյանը նկատեl է, որ այն թրծված է զենքի ուժով և հղկված ազատամարտին մասնակցած հեղինակի գրչով:
Բացի այդ իրադարձությունների օբյեկտիվ ու օպերատիվ լուսաբանմամբ՝ Աշոտ Բեգլարյանն իր գրքում ցույց է տալիս, որ արցախցիների պայքարն արդար է:
Արցախի գրողների միության նախագահ Վարդան Հակոբյանի խոսքով՝ Աշոտ Բեգլարյանի գրիչն ընդգրկուն առանձնահատկություններ ունի, որոնցով նա աշխարհին ներկայացնում է Արցախի ազատագրական պայքարն ու մտահոգությունները:
«Արցախպրես»-ի թղթակցի հետ զրույցում «Ղարաբաղյան օրագիր» գրքի հեղինակ արձակագիր Աշոտ Բեգլարյանը նշել է, որ գրքի կարևոր արժանիքներից մեկն այն է, որ արտացոլված է ինչպես պատերազմական, այնպես էլ հետպատերազմյան շրջանն արտացոլող իրադարձությունները,և դրանք ընթերցողին հնարավորություն են տալիս օբյեկտիվորեն գնահատել ներկայիս ձեռբերումներն ու այն դժվարին ուղին, որով անցել է արցախցին:
Շնորհանդեսին ներկա էին դասախոսներ, ուսանողներ, հեղինակի գրչընկերներ և ընթերցողներ:
