ԼՂՀ կառավարության աշխատակազմի ղեկավար Լևոն Գրիգորյանի ներկայացմամբ, այսօր Ազգային ժողովի արտահերթ նստաշրջանում ի թիվս օրակարգային այլ հարցերի, քննարկվել է «Լեռնային Ղարաբաղի Հանրապետության կառավարության կառուցվածքի մասին» ԼՂՀ օրենքի նախագծի մասին հարցը, որով կադրային և կառուցվածքային փոփոխություններ են նախատեսվում կառավարությունում:
Հայտնի է, թե ինչ փոփոխություններ են նախատեսվում ԼՂՀ կառավարությունում
ՍՏԵՓԱՆԱԿԵՐՏ, ՀՈՒՆԻՍԻ 30, ԱՐՑԱԽՊՐԵՍ: Կառավարության պաշտոնական ներկայացուցիչ Լ. Գրիգորյանի խոսքով, նախագծի նպատակը պետական կառավարման ապարատի պահպանման ծախսերի և օպտիմալացման միջոցով տնտեսված միջոցները ծրագրային զարգացման գլխավոր ուղղություններին նպատակաուղղելն է:
Նախագծով սահմանված փոփոխությունների համաձայն ԼՂՀ կառավարությունում կգործեն՝ առողջապահության նախարարություն,
արդարադատության նախարարություն,
աշխատանքի և սոցիալական հարցերի նախարարություն,
արտաքին գործերի նախարարություն,
գյուղատնտեսության նախարարություն,
էկոնոմիկայի նախարարություն,
կրթության, գիտության և սպորտի նախարարություն,
մշակույթի և երիտասարդության հարցերի նախարարություն,
պաշտպանության նախարարություն,
քաղաքաշինության նախարարություն,
ֆինանսերի նախարարություն, ինչպես նաև կառավարությանն աշխատակազմի ղեկավար նախարար:
Կառավարությանն առընթեր կգործեն` Ազգային անվտանգության ծառայությունը, Արտակարգ իրավիճակների պետական ծառայությունը, շրջակա միջավայրի և բնական ռեսուրսների վարչությունը և ԼՂՀ ոստիկանությունը:
Նախագիծը գլխադասային հանձնաժողովի դրական եզրակացությամբ Ազգային ժողովում ընդունվեց 22 կողմ և 7 ձեռնպահ ձայների հարաբերակցությամբ :
