Նախագահ Սերժ Սարգսյանն այսօր ընդունել է Հայաստանի Հանրապետությունում Եվրոպական միության պատվիրակության ղեկավար, դեսպան Տրայան Հրիսթեային, ով ավարտում է դիվանագիտական առաքելությունը ՀՀ-ում:
Տրայան Հրիսթեան ավարտում է առաքելությունը. Նրան ընդունել է Սերժ Սարգսյանը
ՍՏԵՓԱՆԱԿԵՐՏ, ՀՈՒԼԻՍԻ 23, ԱՐՑԱԽՊՐԵՍ: ՀՀ Նախագահի աշխատակազմի տեղեկատվության և հասարակայնության հետ կապերի վարչության փոխանցմամբ՝ ՀՀ Նախագահը շնորհակալություն է հայտնել դեսպան Հրիսթեային՝ առաքելության ժամանակահատվածում կատարած աշխատանքի եւ Հայաստանի կառավարության, խորհրդարանական ուժերի, քաղաքացիական հասարակության հետ արդյունավետ համագործակցություն հաստատելու համար:
Ընդգծելով, որ Հայաստան-Եվրոպական միություն հարաբերությունների դինամիկ զարգացման գործում մեծ դեր է վերապահված ԵՄ պատվիրակությանը, Սերժ Սարգսյանը հույս է հայտնել, որ Հայաստանում ԵՄ հաջորդ դեսպանը նույն եռանդով ձեռնամուխ կլինի այդ կարեւոր առաքելությանը՝ իր ներդրումը բերելով ՀՀ-ԵՄ կապերի հետագա խորացման գործին:
Տրայան Հրիսթեային Հանրապետության նախագահը մաղթել է հաջողություն եւ նոր ձեռքբերումներ հետագա գործունեության մեջ: Նախագահը գոհունակությամբ է նշել, որ դեսպան Հրիսթեայի պաշտոնավարման անցած չորս տարիներին մեր երկրի համագործակցությունը Եվրամիության, Եվրոպական կառույցների հետ, չնայած աշխարհաքաղաքական վայրիվերումներին, շատ ակտիվ եւ արգասաբեր է եղել՝ նպաստելով ԵՄ հետ Հայաստանի համագործակցության ընդլայնմանն ու ակտիվ փոխգործակցությանն ամենատարբեր ոլորտներում:
«Ես համարում եմ, որ մենք աշխատել ենք անկեղծ, ազնիվ եւ բաց ու կարողացել ենք ստանալ առավելագույնը համագործակցության այս ժամանակահատվածում՝ անցնելով մեծ ճանապարհ եւ կուտակելով զգալի փորձ հետագա փոխգործակցության համար»,-ասել է նախագահ Սերժ Սարգսյանը, ընդգծելով, որ Հայաստանը հանձնառու է շարունակել ԵՄ-ի հետ համագործակցությամբ սկսած բարեփոխումները:
Դեսպան Տրայան Հրիսթեան շնորհակալություն է հայտնել նախագահին՝ իր աշխատանքին տված գնահատականի եւ ջերմ խոսքերի համար, նշելով, որ դրանք ընկալում է առաջին հերթին որպես գնահատանքի խոսքեր ԵՄ-ի եւ ՀՀ-ի միջեւ հաստատված երկկողմ հարաբերությունների կապակցությամբ:
Արդյունավետ համագործակցությունը եւ բոլոր հնարավոր մակարդակներում ձեւավորված ակտիվ երկխոսությունը դեսպան Հրիսթեան պայմանավորել է նաեւ այն ընդհանուր արժեքներով, որ ունեն Հայաստանը եւ Եվրոպական միությունը: Նա վերահաստատել է ԵՄ հանձնառությունը՝ բարեփոխումների ուղղությամբ շոշափելի արդյունքների հասնելու գործում շարունակելու եւ զարգացնելու Հայաստանի հետ սերտ համագործակցությունն ու երկխոսությունը:
Հանդիպման ավարտին Տրայան Հրիսթեան վստահեցրել է, որ որտեղ էլ լինի, Հայաստանը մնալու է իր սրտում, եւ նշել, որ մեր երկրից հեռանում է լավագույն ու ջերմ հիշողություններով: