Կոալիցիոն կառավարություն կազմելու նպատակով մեկնարկել է Թուրքիայի խորհրդարանական ընտրություններում առավելագույն ձայներ ստացած «Արդարություն և զարգացում» կուսակցության ներկայացուցչական խմբի երկրորդ հանդիպումը քեմալական Հանրապետական ժողովրդական կուսակցության անդամների հետ:
Դավութօղլուի կուսակցությունը կոալիցիայի համար կրկին հանդիպել է քեմալականներին
ՍՏԵՓԱՆԱԿԵՐՏ, ՀՈՒԼԻՍԻ 28, ԱՐՑԱԽՊՐԵՍ: Թուրքական «Անադոլու» գործակալությոան փոխանցմամբ, հանդիպմանն իշխող կուսակցության կողմից մասնակցել են փոխվարչապետ Նուման Քուրթուլմուշը, մշակույթի և զբոսաշրջության նախարար Օմեր Չելիքը, զարգացման նախարար Ջևդեթ Յըլմազը և այլոք: Քեմալական կուսակցությունից հանդիպմանը մասնակցել են կուսակցության ղեկավարի տեղակալներ Հալուք Քոչը, Բյուլենթ Թեզջանն ու այլոք:
Երկու կուսակցությունների` կոալիցիոն կառավարության շուրջ բանակցություններ վարելու նպատակով ստեղծված խմբերն առաջին անգամ հանդիպել են հուլիսի 24-ին: Հանդիպումն այդ անգամ տևել էր 5 ժամ:
Թուրքիայում հունիսի 7-ին անցկացված հերթական խորհրդարանական ընտրութուններում ստանալով ընտրողների ձայների 40.8 տոկոսը, ԱԶԿ-ին չի հաջողվել միանձնյա կառավարություն ձեւավորելու համար անհրաժեշտ պատգամավորական աթոռներ զբաղեցնել խորհրդարանում: Ինչի պատճառով, Դավութօղլուն նոր կոալիցիոն կառավարություն ստեղծելու համար բանակցում է խորհրդարան անցած Ժողովրդահանրապետական (ԺՀԿ), Ազգայնական շարժում եվ քրդական Ժողովուրդների դեմոկրատական (ԺԴԿ) կուսակցությունների հետ:
Բանակցությունների ընթացքը ցույց է տալիս, որ հավանական է` ԱԶԿ-ը կոալիցիա ստեղծի ԺՀԿ-ի հետ, սակայն, Թուրքիայի վերնախավին մոտ կանգնած շրջանակները հայտնում են, որ երկրի նախագահ Ռեջեփ Թայիփ Էրդողանը համառորեն դեմ է հանդես գալիս կոալիցիոն կառավարության ձեւավորմանը: Էրդողանը մեկ անգամ եւս հայտարարել էր, որ «կոալիցիոն կառավարությունը չի կարող ապահովել Թուրքիայի հետագա զարգացումը»: