Հադրութի շրջանի Տող գյուղում՝ Տողի Մելիքական ապարանքում ԼՂՀ էկոնոմիկայի նախարարության և մասնավոր ընկերությունների հետ համագործակցությամբ հոկտեմբերի 17-ին կկայանա արցախյան գինու երկրորդ փառատոնը։
Արցախում կկայանա գինու երկրորդ փառատոնը
ՍՏԵՓԱՆԱԿԵՐՏ, սեպտեմբերի 10, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է ԼՂՀ էկոնոմիկայի նախարարության զբոսաշրջության վարչության ծրագրերի կառավարիչ Արտակ Գրիգորյանը:
«Այս անգամ ևս գինու փառատոնը կկազմակերպվի ժամանցի, ուրախության ու հանգստի ոգով: Փառատոնի հյուրերին սպասվում է Արցախյան գինու և բերքի ցուցահանդես-վաճառք, բովանդակալից համերգային ծրագիր, ավանդական խաղեր, ինչպես նաև ձեռքի աշխատանքների ցուցահանդես»,-նշել է Ա. Գրիգորյանը:
Ա. Գրիգորյանի խոսքով՝ գինու տոնավաճառին ներկայացված են լինելու գինեգործությամբ հայտնի ԼՂՀ բոլոր շրջանները, ինչպես նաև գինեգործներ Հայաստանի Հանրապետությունից:
Նշենք նաև, որ տոնավաճառի շրջանակներում կազմակերպվելու է գինու նախուտեստ և պրոֆեսիոնալ սոմելիեի վարպետության դաս: