Երեւանում անցկացվող «Հայֆեստ» 13-րդ միջազգային կինոփառատոնին մասնակցող դերասան, պարուսույց Գաբրիել Նյուհաուսը եւ հայկական «ՄԻՀՐ» թատրոնը փառատոնի շրջանակում համատեղ «Լավաշ» ներկայացումը պատրաստելիս օգտագործել են հայկական լավաշի պատրաստման որոշ շարժումներ:
Հայկական լավաշը` շվեյցարացի պարուհու նոր բեմադրության ներշնչանք
ՍՏԵՓԱՆԱԿԵՐՏ, հոկտեմբերի 7, ԱՐՑԱԽՊՐԵՍ։ Այս մասին NEWS.am-ին ասաց Գաբրիել Նյուհաուսը, որը «Հայֆեստի»՝ Իսրայելից ժամանած մասնակիցն է եւ «Գաբրիել Նյուհաուս» թատրոնի հիմնադիրը:
«Ես լավաշի պատրաստման մասին ֆիլմն եմ նայել, մենք օգտագործել ենք որոշ շարժումներ, դրանից գաղափարներ են ծնվել, որոնք անհավատալի արդյունք են տվել»,- ասաց նա:
Գաբրիել Նյուհաուսը հայկական լավաշին ծանոթացել է միայն փառատոնին մասնակցելու համար Հայաստան ժամանելուց հետո: Նա պատմեց, որ հետաքրքրված է եղել տարբեր երկրներում հացի պատրաստման ձեւերով եւ նախկինում նույնպես նմանատիպ ներկայացումներ է ունեցել:
Հայկական լավաշը ծագումով Շվեյցարիայից պարուհուն ամենից շատ դուր է եկել իր տարբերվող տեսքի ու համի համար:
«Այլ վայրերում նման հացի տեսակներ հանդիպել եմ, բայց հայկական լավաշը ձեւով տարբեր է: Ես հավանեցի, թե ինչքան արագ պետք է այն ուտես, որ չչորանա: Այն ճկուն է, հնարավոր է փաթաթել` ինչպես ուզես»,- ասաց Գաբրիել Նյուհաուսը:
Շվեյցարուհին արդեն 10 օր է՝ ինչ Հայաստանում է, հասցրել է այցելել մի քանի վայրեր մայրաքաղաքում: Նա վաղը Գառնի կմեկնի, որտեղ հույս ունի իրականում տեսնել, թե ինչպես են հայկական լավաշը պատրաստում:
«Լավաշ» ներկայացումը նվիրված է Հայոց ցեղասպանության 100–րդ տարելիցին։ Գաղափարի հիմքում այն համոզմունքն է, որ ազգի պահպանման գրավականը մշակույթն է, իսկ հացն այն մշակույթն է, որը պահպանում է ապրելու եւ հարատեւելու գաղտնիքը։
Նշենք, որ «Հայֆեստն» անցկացվում է հոկտեմբերի 1-ից 8-ը: Փառատոնի շրջանակում Հայաստան է ժամանել 250 մասնակից 25 երկրից (Մեծ Բրիտանիա, ԱՄՆ, Ֆրանսիա, Իտալիա, Ավստրիա, Ֆինլանդիա, Գերմանիա, Շվեդիա, Շվեյցարիա, Կանադա, Լեհաստան, Լիբանան, Իսրայել, Լիտվա, Հունգարիա, Չեխիա, Նորվեգիա, Հունաստան, Էստոնիա, Սերբիա, Ղազախստան, Բանգլադեշ, Ռուսաստան, Իրան, Վրաստան եւ այլն):