ԼՂՀ կառավարության նախաձեռնությամբ նախօրեին Մարտակերտի շրջան կատարած շրջայցի շրջանակներում մի խումբ լրագրողներ եղել են Թալիշի համայնքում և ծանոթացել կառավարության՝ տեղի գյուղատնտեսության խթանման ուղղությամբ կատարած ներդրումներով իրականացված աշխատանքներին։
Թալիշի սահմանամերձ հողատարածքներում շուրջ 550 հա ցանքս է կատարվել
ԼՂՀ կառավարության նախաձեռնությամբ նախօրեին Մարտակերտի շրջան կատարած շրջայցի շրջանակներում մի խումբ լրագրողներ եղել են Թալիշի համայնքում և ծանոթացել կառավարության՝ տեղի գյուղատնտեսության խթանման ուղղությամբ կատարած ներդրումներով իրականացված աշխատանքներին։
«Արցախպրես»-ի հաղորդմամբ, լրագրողների հետ զրույցում ԼՂՀ վարչապետի խորհրդական Արամ Մխոյանը տեղեկացրեց, որ անցած տարվանից պետբյուջեի միջոցներով կառուցվել և Թալիշի հողատարածքների ոռոգման համար շահագործման է հանձնվել տարածաշրջանում աննախադեպ հզորությամբ պոմպակայան, որը վայրկյանում առավելագույնը 750 լիտր ջուր մղելու հնարավորություն ունի: Ա. Մխոյանի խոսքով՝ այն ներկայումս աշխատում է վայրկյանում շուրջ 500 լ հզորությամբ։
«Ջուրը Թարթառ գետից մղվում և 3 կմ-անոց ջրատարով բարձրացվում է 157 մետր։ Պոմպակայնն ամբողջ հզորությամբ գործարկելու դեպքում հնարավոր է ոռոգել ավելի քան 1000 հա հողատարածք»,-մանրամասնեց վարչապետի խորհրդականը՝ հավելելով նաև, որ «Գյուղի և գյուղատնտեսության աջակցության հիմնադրամ»-ի միջոցներով Թալիշի սահմանամերձ հողատարածքներում շուրջ 550 հա ցանքս է կատարվել, որից 350 հա՝ եգիպտացորեն, 130 հա՝ արևածաղիկ և 70 հա՝ սորգո, որոնց մշակությունը կատարվում է գյուղատնտեսական բոլոր չափորոշիչներին համապատասխան։
Ա. Մխոյանի հավաստմամբ՝ բերքահավաքի արդյունքում ձեռքբերված շահույթը «Թալիշ» հիմնադրամի միջոցով հավասարապես բաշխվելու է գյուղի բնակչությանը։ Հետագայում էլ նախատեսվում է ոռոգովի դաշտերի տնօրինումն ամբողջությամբ հանձնել թալիշցիներին։
Նշենք նաև, որ ըստ պատասխանատուների, ծրագրի արդյունքում ստեղծվել է շուրջ 50 աշխատատեղ՝ օրական 8000 դրամ միջին աշխատավարձով։
