Այսօր՝ փետրվարի 12-ին կայացել է ԼՂՀ հանրային ծառայությունները և տնտեսական մրցակցությունը կարգավորող պետական հանձնաժողովի՝ 2016 թվականի երկրորդ նիստը:
Քաշաթաղի շրջանում նոր փոքր ՀԷԿ-եր կկառուցվեն
ՍՏԵՓԱՆԱԿԵՐՏ, փետրվարի 12, ԱՐՑԱԽՊՐԵՍ: «Արցախպրես»-ի հաղորդմամբ՝ Հանձնաժողովը բավարարել է «ԼԵՎ ԷՆԵՐՋԻ» սահմանափակ պատասխանատվությամբ ընկերության ներկայացրած հայտը և տրամադրել ԼՂՀ Քաշաթաղի շրջանի Ծիծեռնավանք և Մոշաթաղ համայնքների տարածքում «Աղավնո» փոքր հիդրոէլեկտրակայանի կառուցման լիցենզիա` մինչև 2019 թվականի ապրիլի 1-ը գործողության ժամկետով: Լիցենզիայի սահմանված պայմաններին համաձայն՝ «Աղավնո» ՓՀԷԿ-ը ունենալու է 4,690 ՄՎտ դրվածքային հզորություն:
Նիստում քննարկվել է հիդրոէլեկտրակայանի կառուցման լիցենզիա ստանալու ևս մեկ հայտ և «Սահման» ՍՊԸ-ին տրամադրվել ԼՂՀ Քաշաթաղի շրջանի Հակ համայնքի տարածքում «Սահման» փոքր հիդրոէլեկտրակայանի կառուցման լիցենզիա` մինչև 2016 թվականի դեկտեմբերի 31-ը գործողության ժամկետով: Լիցենզիայի սահմանված պայմաններին համաձայն՝ «Սահման» ՓՀԷԿ-ը ունենալու է 0,371 ՄՎտ դրվածքային հզորություն:
ՀԾՏՄԿՊ հանձնաժողովի նախագահ Լևոն Մնացականյանն ամփոփելով ընդհանուր իրավիճակը՝ հայտնեց, որ գործարկելով վերոնշյալ փոքր ՀԷԿ-երը՝ Արցախում արտադրվող ընդհանուր էլեկտրաէներգիայի ծավալը կհասնի 450 մլն կվտ/ժ-ի: Հանրապետությունում 2016թ. Էլեկտրաէներգիայի պահանջարկի կանխատեսվող՝ 330մլն կվտ/ժ ծավալի դեպքում կարելի է հասնել էներգետիկ ինքնաբավության և արտահանման:
Նիստի օրակարգի հաջորդ հարցով Հանձնաժողովը համաձայնություն է տվել «Վիսավտ» սահմանափակ պատասխանատվությամբ ընկերության 25 տոկոս բաժնետոմսերի վաճառքին:
Նիստի ավարտին Լևոն Մնացականյանը տեղեկացրեց, որ Հանձնաժողովի գործունեությունն ավելի բաց դարձնելու և տեղեկատվությունն ավելի լայն մասսաներին հասանելի դարձնելու համար այսուհետ թվիթթեր (www.twitter.com) սոցիալական կայքում էլ կգործի Հանձնաժողովի պաշտոնական էջ: