Մարտի 9-ին Արցախում ավարտվել է առարկայական օլիմպիադայի հանրապետական փուլը։
Առարկայական օլիմպիադայի եզրափակիչ փուլին Արցախից կմասնակցեն 69 աշակերտ
ՍՏԵՓԱՆԱԿԵՐՏ, 14 մարտի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է ԼՂՀ կրթության, գիտության և սպորտի նախարարության կրթության և գիտության վարչության պետ Ռայա Մուսայելյանը՝ նշելով որ, հանրապետական փուլին մասնակցած 396 աշակերտից Երևանում կայանալիք եզրափակիչ փուլին կմասնակցեն 69-ը:
Ռ. Մուսայելյանի խոսքով՝ այս տարի եզրափակիչ փուլին առաջին անգամ աշակերտները մասնակցելու են նաև գերմաներեն և ֆրանսերեն լեզու առարկաներից:
«Բացի քիմիա և աստղագիտություն առարկաներից, Արցախի աշակերտները եզրափակիչ փուլին մասնակցում են բոլոր առարկաներից»,-ասել է Ռ. Մուսայելյանը:
ԼՂՀ ԿԳ և սպորտի նախարարության մասնագետը գոհացուցիչ է համարել առարկայական օլիմպիադայի հանրապետական փուլի արդյունքները և հույս հայտնել, որ եզրափակիչ փուլում նույնպես գիտելիքների բարձր ցուցանիշներ կարձանագրվեն։
Անդրադառնալով հարցին, թե արդյոք տարեցտարի ընդլայնվում է օլիմպիադայի ցանկում ընդգրկվող առարկաների շրջանակը, Ռ. Մուսայելյանը նշել է, որ Արցախում բոլոր առարկաներից անց է կացվում օլիմպիադա:
Հիշեցնենք, որ առարկայական օլիմպիադայի եզրափակիչ փուլը մեկնարկել է մարտի 13-ին և կավարտվի մայիս ամսում։