Պալմիրայի առավել հայտնի հուշարձանները, ներառյալ երկու ամենահռչակավոր տաճարները, ենթարկվել են լուրջ ավերման, սակայն հնադարյան օբյեկտների հիմնական մասի վնասը համեմատաբար մեծ չի եղել:
Պալմիրայի ամենահայտնի հուշարձանները ոչնչացված են. Սիրիայի թանգարանների դիրեկտորատի ղեկավար
ՍՏԵՓԱՆԱԿԵՐՏ, 29 մարտի, ԱՐՑԱԽՊՐԵՍ: Ճապոնական Yomiuri եւ Asahi թերթերում հրապարակված հարցազրույցներում այս մասին հայտարարել Է Սիրիայի հնությունների եւ թանգարանների գլխավոր դիրեկտորատի ղեկավար Մամուն Աբդուլքարիմը:
Նրա խոսքով՝ հաստատված Է Պալմիրայի խորհրդանիշերի՝ Բելի տաճարի (I դար) եւ Բաալշամինի տաճարի (II դար), Հաղթության կամարի, «Ալլաթ առյուծ» արձանի, թաղման աշտարակների ավերումն այսպես կոչված Դամբարանահովտում: Միեւնույն ժամանակ գործնականում անձեռնմխելի են մնացել հռոմեական տիրապետության դարաշրջանում կառուցված թատրոնը, ինչպես նաեւ այն բազմաթիվ կիսանդրիները, որոնք, ինչպես վախենում Էին գիտնականները, «Իսլամական պետության» ահաբեկիչները կարող Էին վաճառել հնությունների «սեւ շուկայում»:
«Ալլաթ առյուծ» արձանի վնասվածքները նույնպես աննշան են, այն ենթակա Է վերականգնման»,- նշել Է դիրեկտորատի ղեկավարը: Նա հայտնել Է, որ Սիրիայի մշակույթի նախարարությունը մոտ ժամանակներս քաղաք կուղարկի մի խումբ փորձագետների, որպեսզի մանրամասնորեն գնահատվի հնադարյան հուշարձանների վիճակը, հաղորդել Է ՏԱՍՍ-ը:
