Ռազմական պատմաբան, պահեստազորի գնդապետ Մնացական Խաչատրյանի համոզմամբ՝ պատերազմը լակմուսի թուղթ է, որը շատ բան է ցույց տալիս:
Մենք պետք է բանակ-ազգ լինենք և անցնենք ռազմարդյունաբերական նոր մակարդակի. պահեստազորի գնդապետ
ՍՏԵՓԱՆԱԿԵՐՏ, 15 ապրիլի, ԱՐՑԱԽՊՐԵՍ: Tert.am-ի հաղորդմամբ՝ գնդապետն ասել է, որ հայկական կողմը ոչ միայն իր իրական պոտենցիալը չի պատկերացնում, այլ նաև չունի ձևակերպված համազգային նպատակ։
«Մենք պետք է բանակ-ազգ լինեք, ընդ որում ոչ թե հանրապետության մասշտաբով, այլ նաև սփյուռքի մասշտաբով։ Երբ ասում ենք՝ 12 մլն ենք, պետք է դառնանք բանակ-ազգ. առայժմ ցավոք այդպես չէ, բայց եթե այդ շանսը ունենանք, մենք կարող ենք այս տարածաշրջանում մենակ պայքարել»,-հրավիրված ասուլիսին ասաց նա:
Ըստ նրա՝ նման օրինակը Իսրայելն է, որ պետություն է ստեղծել անապատի մեջ:
«Որպես բարձր տեխնոլոգիաների երկիր առաջինն է աշխարհում»,-մատնացույց արեց նա և նշեց, թե նույն իսրայելական «Կամիկաձե» թռչող սարքերը պատերազմական պայմաններում չէին փորձարկվել, ինչը նրա մասնագետները արեցին ԼՂ դեմ ադրբեջանական բանակի կողմից այս քառօրյա պատերազմում:
«Եկեք հասկանանք, որ «Սպայք» հրթիռը՝ լազերային ուղղորդմամբ, նա Ադրբեջանին է տվել մարտի 31-ին։ Պարզ է չէ՞, որ Ադրբեջանը չէր կարող մասնագետ պատրաստել այդ կարճ ժամանակում, և իսրայելական ռազմական մասնագետներ են գործածել: Սա էլ ցույց է տալիս, որ հանգիստ կերպով գործածում են և վախենալու բան չունեն»,-ասաց նա:
Բանակ-ազգ լինելուց բացի, ըստ նրա, պետք է համակարգային փոփոխությունների գնալ:
«Մեր քաղաքական համակարգն արդիականացման անհրաժեշտություն ունի՝ տարածաշրջանում գոյատևման համար: Տնտեսական փոփոխությունից բացի նաև ռազմական փոփոխության կարիք կա: Ինչո՞ւ, որովհետև այն, ինչ ունենք, մեզ թույլ է տալիս պատերազմել թշնամու դեմ չորրորդ սերնդի պատերազմի մակարդակով»,-ասաց նա և նշեց, թե մինչդեռ, ըստ նրա, արդեն աշխարհը պատերազմում է 6-րդ սերնդի պատերազմի մակարդակով:
Չորրորդ սերնդի պատերազմը, ըստ նրա, 41-45թթ-ին հարիր ավտոմատացված պատերազմն է:
«Մենք այդ պատերազմի մակարդակի վրա ենք ցավոք սրտի, և մեր ամբողջ տակտիկան օպերատիվ արվեստի, դեռ այդտեղ է»,-ասաց նա:
5-րդ սերնդի պատերազմը, ըստ նրա, ոչ շփումային պատերազմն է, հեռահար հրթիռներ և այլն: Իսկ հիմա արդեն 6-րդ սերնդի պատերազմ է գնում՝ գերճշգրիտ զենքեր, որոնցից էլ Ադրբեջանը կիրառեց հայերի դեմ:
«Այս դեպքում արդեն պետք չեն հսկայական բանակներ, մեծաքանակ տեխնիկա, հեռվից հարվածում են: Իհարկե մենք կռվում ենք մեր ոգով և այդ հին զենքերով, և դա շատ լավ է։ Հայ զինվորն ապացուցեց, որ լավագույն է, ոչ թե տարածաշրջանի, այլ աշխարհի: Հասարակ հայ տղան, որ 5 տանկ է խփել, ո՞ւմ ասես, որ չզարմանա. վազում է, տեսնում 10 հատ տանկ է մեր դեմ կանգնած, ու հետն էլ ուղղաթիռն է գալիս, ինչն ավելի սարսափելի է: Նա բոցի ծովի կվերածեր պաշտպանական խրամատները, ու գումարտակը կվերանար։ Հիմա էդ մի տղան սառնարյուն կերպով կարողանում է հաշվառել ուղղաթիռի ուղղությունները, ճիշտ հարվածում է նռնականետով ու ոչնչացնում է։ Բայց միևնույն է՝ մենք հետ ենք, ու դա քիչ է, չնայած այդտեղ անգերազանցելի ենք, բայց պետք է սպառազինվենք, գերճշգրիտ սարքեր մենք էլ պետք է անենք»,-ասաց նա:
