Ստեփանակերտի «Թումո» ստեղծարար տեղեկատվական տեխնոլոգիաների կենտրոնում հյուրընկալվել է «Պանարմենիան մեդիա գրուպ» ընկերության գլխավոր դիզայներ, տվյալների վիզուալիզացիայի մասնագետ, լրագրող, բլոգեր Սեդրակ Մկրտչյանը, ով հունիսի 8-ից հանդես է գալիս տվյալների վիզուալիզացիայի (մտավոր պատկերացում) ու ինֆոգրաֆիկայի մասին դասախոսությամբ:
Վիզուալիզացիայի մասնագետը Ստեփանակերտի «Թումո» կենտրոնում դասախոսություններ է վարում
ՍՏԵՓԱՆԱԿԵՐՏ, 16 հունիսի, ԱՐՑԱԽՊՐԵՍ: «Արցախպրես»-ի թղթակցի հետ զրույցում Սեդրակ Մկրտչանը նշել է, որ դասախոսությունն ինֆոգրաֆիկայի վերաբերյալ ներածական գիտելիքներ տրամադրելու ուղղվածություն ունի:
«Ինֆոգրաֆիկան ինֆորմացիայի և տվյալների գրաֆիկորեն վիզուալ ներկայացման մի ձև է, որը հնարավորություն է տալիս արագ և պարզ ամբողջական տեղեկատվությունը ներկայացնելու։ Ինֆոգրաֆիկան պետք է բաղկացած լինի 3 մասից՝ վիզուալիզացումից, կոնտենտից և գիտելիքից։ Վիճակագրությունը և փաստերը սովորաբար ապահովում է ինֆոգրաֆիկայի կոնտենտային հատվածը. նրանց ստացման աղբյուրները բազմաթիվ են։
Ինֆոգրաֆիկայի մյուս կարևոր ասպեկտն այն է, որ, ներկայացնելով այդ տվյալները, ինֆոգրաֆիկան այդ տեղեկատվության որոշակի բացահայտում է տալիս, որն էլ հենց գիտելիքն է։ Ինֆոգրաֆիկան կարող է շատ արդյունավետ գործիք հանդիսանալ, սակայն չպետք է մոռանալ, որ նրա հիմնական իմաստը տվյալների և տեղեկատվության տրամադրումն է»,-ասել է Ս. Մկրտչյանը և ընդգծել, որ Արցախի երեխաները բավականին խելացի ու բանիմաց են ու ամենակարևորը մեծ սիրով ու հետաքրքրությամբ են մասնակցում դասընթացին։
Ս. Մկրտչյանի խոսքով` այս ոլորտում ինքը բավականին երկար է աշխատել ու գտնում է, որ իր գիտելիքներով ի վիճակի է կիսվել սովորողների հետ: Դասընթացը ներկայացնում է 2 առարկաների միաձուլում, որն իրենից ներկայացնում է գրաֆիկական դիզայն և տվյալների լրագրություն, որոնք վերաբերում են աշխատանքների տվյալներին:
«Այժմ պրակտիկ աշխատանքներ ենք կատարում: Նպատակն այն է, որ սովորողները կարողանան թղթի վրա նորմալ նկարեն վերջնական աշխատանքը, որից հետո կաշխատենք համակարգչի օգնությամբ: Ոլորտը շատ կարևոր է, որովհետև տվյալների ինֆոգրաֆիկան ու տվյալների բազան ներկա փուլում աշխարհում լուրջ զարգացում է ապրում: Նպատակներից մեկն էլ այն է որ որոշակի բովանդակությամբ հոդվածներ, վիճակագրություն, առօրյա լուրեր ինֆոգրաֆիկայի տեսքով ներկայացնել, որոնք հրապարակվելով դրանք ավելի հասանելի կլինեն ընթերցող հասարակությանը, հեռուստադիտողներին: Կցանկանայի այստեղ վիզուալիզացիայի ձիրքն ավելի զարգացնել: Համոզված եմ, որ դասընթացներից հետո մենք ունենալու ենք որակյալ մասնագետներ: Այս փուլում փորձում եմ երեխաների մոտ առաջացնել սեր ու հետաքրքրություն այս առարկայի հանդեպ»,-ավելացրել է Ս. Մկրտչյանը և նշել, որ դասընթացի մասնակիցները հետագայում կկարողանան ավելի զարգանալ, աճել ու դառնալ լիարժեք մասնագետներ:
Ս. Մկրտչյանի հավաստմամբ` նման դասընթացների արդյունքում տարբեր ոլորտներում կունենաք լուրջ հաջողություններ` թե´ լրատվական, թե´ քարոզչական դաշտերում և թե´ յուրաքանչյուր տվյալների վիզուալիզացիայում. դրանք զարգանում են տարիներ շարունակ, և ինքը համոզված է, որ ավելի ու ավելի մեծ պահանջարկ ենք ունենալու ու մեր շուրջը տեղի ունեցող իրադարձությունները մենք ինֆոգրաֆիկայի միջոցով հաղորդելու ենք` այն ավելի հանրային դարձնելու համար` օգտագործելով վիճակագրական ու պատմական փաստեր:
