Այսօր Արցախի պետական համալսարանի դահլիճում տեղի է ունեցել Հայաստանի Հանրապետության կրթության և գիտության նախարար Լևոն Մկրտչյանի հանդիպումը ԼՂՀ կրթության ոլորտի ներկայացուցիչների հետ:
Կրթական համակարգի երկու օղակ դեռ չեն կայացել. ՀՀ ԿԳ նախարար
ՍՏԵՓԱՆԱԿԵՐՏ, 17 հունիսի, ԱՐՑԱԽՊՐԵՍ:«Արցախպրես»-ի թղթակցի հաղորդմամբ՝ ՀՀ և ԼՂՀ կրթության և գիտության նախարարները նախ ծաղիկներ են խոնարհել արցախյան ազատամարտում ԱրՊՀ զոհված ուսանողների հիշատակը հավերժացնող հուշաքարին:
Հանդիպման ժամանակ, ողջույնի խոսքում ԼՂՀ կրթության, գիտության և սպորտի նախարար Սլավա Ասրյանը նշել է, որ ՀՀ և ԼՂՀ կրթության և գիտության նախարարությունների միջև ձևավորված համագործակցությունը գտնվում է բարձր մակարդակի վրա, ինչը մեծապես նպաստում է ոլորտում տարբեր ծրագրերի արդյունավետ իրականացմանը:
Հանդիպմանը քննարկվել են Արցախում գիտության ու կրթության զարգացմանը և այդ ոլորտում երկու հայկական հանրապետությունների փոխգործակցությանը վերաբերող հարցեր:
ՀՀ կրթության և գիտության նախարար Լևոն Մկրտչյանն իր խոսքում անդրադարձել է ՀՀ կրթության և գիտության ոլորտում կատարված աշխատանքներին ու առկա խնդիրներին:
«Այսօր մեր բոլոր կրթական չափանիշները համապատասխանում են միջազգային ընդունված ձևաչափերին: Հայաստանի կրթական վկայականները պետք է ընդունելի լինեն ամբողջ աշխարհում և ոլորտում իրականացված բարեփոխումների հիմքում դրված է եղել այս խնդիրը: Այսօր առաջնային է մնում կրթության որակի պահպանման և վերականգնման խնդիրը»,- ասել է Լ. Մկրտչյանը:
Այդուհանդերձ, նույնիսկ կրթական բարեփոխումների արդյունքում, ըստ Լ. Մկրտչյանի կրթական 2 օղակ՝ ավագ դպրոցները և մագիստրատուրան չեն կայացել:
«Չենք կարողանում հանրակրթությունից ապահովել սահուն բովանդակային անցում դեպի մասնագիտական կրթություն, ինչը ավագ դպրոցների խնդիրն է: Բացի այդ, չենք կարողանում բակալավրիատի կրթությունից հետո ճիշտ որոշել մագիստրատուրայի կրթության վիճակը, որը ապահովում է մեր անցումը դեպի գիտություն և որակյալ աշխատաշուկա»,- պարզաբանել է Լ. Մկրտչյանը:
Անդրադառնալով կրթական ծրագրերի բեռնաթափմանը ՀՀ ԿԳ նախարարը նշել է, որ նման գործընթացի անհրաժեշտություն, իրոք, զգացվում է:
Հանդիպմանը Լ. Մկրտչյանը պատասխանել է ներկաներին հուզող հարցերին, որոնք վերաբերում էին կրթության և գիտության ոլորտներում առկա խնդիրներին, բարեփոխումներին, ինչպես նաև առաջիկայում նախատեսվող ծրագրերի ընթացքին:
