Օգոստոսի 1- 8-ը ՀՀ ԵԿՄ վարչության նախագահ, Արցախի հերոս գեներալ-լեյտենանտ Մանվել Գրիգորյանի անմիջական նախաձեռնությամբ կազմակերպված «Պատանի երկրապահ» ակումբի ուսումնամարզական ճամբարում հանգիստն անցկացրած Արցախի երեխաները տուն են վերադարձել:
«Պատանի երկրապահ» ճամբարում հանգստացած արցախցիները անչափ տպավորված են (լուսանկարներ)
ՍՏԵՓԱՆԱԿԵՐՏ, 11 օգոստոսի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է Ստեփանակերտի թիմի ղեկավար Իվետա Թադևոսյանը՝ ավելացնելով, որ ստեփանակերտցիներից բացի ճամբարին մասնակցել են նաև Մարտակերտի և Հադրութի թիմերը՝ ընդհանուր առմամբ 10-15 տարեկան 63 երեխա:
Ճամբարն անցկացվել է Գեղարքունիքի մարզի Ծովինար գյուղի վարչական տարածքում՝ Սևանա լճի անտառային ափամերձ գոտու հատվածում:
«Կրթության, գիտության և սպորտի նախարարության հետ համաձայնեցնելով՝ ճամբարականների 10-րդ հոսքի ղեկավար էի ընտրվել: Ըստ ճամբարի կարգացուցակի՝ կազմակերպվել է տարաբնույթ միջոցառումներ՝ զանազան պարապմունքներ, սպորտային մրցումներ, դաստիարակչական և իրավական աշխատանքներ. կազմակերպվել է նաև արշավ դեպի Սևանա կղզի: ՊՆ և ԱԻՆ ներկայացուցիչները տարբեր թեմաների շուրջ կազմակերպել են դասընթացներ: Դասախոսությամբ հանդես են եկել հայ առաքելական եկեղեցու ներկայացուցիչները»,- մանրամասնել է Ի. Թադևոսյանը, ով, ի դեպ «Պատանի երկրապահ» ակումբի կողմից պարգևատրվել է նաև ՀՀ ԵԿՄ «Պատանի երկրապահ» ակումբի ուսումնամարզական ճամբարում ակտիվ մասնակցություն ցուցաբերելու համար պատվոգրով:
Իվետա Թադևոսյանը նշել է, որ «Պատանի երկրապահ» ակումբի ուսումնամարզական ճամբարի ղեկավար Նարեկ Գասպարյանը ուշադրությունը կենտրոնացրել էր երեխաների մեջ ռազմահայենասիրական դաստիարակության վրա. նա առանձնակի ուշադրություն էր հատկացրել Ստեփանակերտի թիմին:
Դիանա Առուստամյանը, ով եղբոր հետ Ռուսաստանից էր եկել Արցախում տատիկի մոտ հանգստանալու համար, ուրախությամբ ընդգծել է. «Իմ բարեկամուհիները, ովքեր արդեն եղել էին ճամբարում, մեզ խորհուրդ են տվել բաց չթողնել հնարավորությունը և գալ ճամբար: Չնայած դժվարությամբ եմ հայերեն խոսում, բայց դա չէր խոչընդոտում նոր ընկերներիս հետ շփումներին: Ես արդեն կարողանում եմ երգել մեր պետական օրհներգը և ռազմահայրենասիրական երգեր, ինչի համար ես և ուրախ եմ, և հպարտ: Ես հայրենիքիս հետ կապված հաճելի հուշեր կտանեմ ինձ հետ տուն»:
Ճամբարում հանգստացած Արցախի բոլոր մասնակիցները գոհ ու շնորհակալ են իրենց նկատմամբ ցուցաբերած ուշադրության ու հոգացության կապակցությամբ, առանձնապես տպավորված են թե Նարեկ Գասպարյանից, թե փոխնախագահ Արմեն Հախումյանցից և թե մնացած աշխատակիցներից: