Իտալիայի մշակույթի նախարար Դարիո Ֆրանչեսկինին կոչ է արել Իտալիայի բոլոր քաղաքացիներին կիրակի օրն այցելել թանգարաններ, հնագիտական վայրեր և պատմական հուշարձաններ, և այդկերպ իրենց համերաշխությունը ցույց տալ երկրաշարժից տուժած շրջանի բնակիչներին:
Իտալիայի թանգարաններում կիրակի օրվա տոմսերի վաճառքից գոյացած գումարը կտրամադրվի ավիրված քաղաքների վերականգնմանը
ՍՏԵՓԱՆԱԿԵՐՏ, 28 օգոստոսի, ԱՐՑԱԽՊՐԵՍ: Տոմսերի վաճառքից ստացված գումարը կփոխանցվի ավիրված քաղաքների վերականգնմանը. հայտնում է BBC-ի ռուսական ծառայությունը:
Ֆրանչեսկինիի խոսքով՝ ամբողջությամբ ոչնչացել կամ լրջորեն վնասվել է մշակութային և պատմական նշանակության 293 շինություն: Դրանցից շատերը եկեղեցիներ են:
Բացի դրանից՝ նշվում է, որ Իտալիայի եկեղեցիներում կիրակնօրյա պատարագի ժամանակ այցելուների նվիրատվությունները նույնպես կուղղվեն երկրաշարժից տուժած շրջանին:
Ավելի վաղ հաղորդվել է, որ նախորդ շաբաթ կենտրոնական Իտալիայում տեղի ունեցած երկրաշարժի հետևանքով զոհերի թիվը հասել է 290-ի: Նման տվյալներ է հրապարակել Քաղաքացիական պաշտպանության վարչությունը: Մահացածների մեծ մասը Ամատրիչե քաղաքից են:
Հիշեցնենք, որ 6.0 մագնիտուդով ցնցումը տեղի է ունեցել օգոստոսի 24-ին, այնուհետև հաջորդել են բազմաթիվ հետցնցումներ: