Հադրութի շրջանի Տող գյուղի հարակից տարածքում գտնվող «Ջրաշխարհ» հանգստի գոտիում ավարտվել է Արցախի առաջատար քաղաքական ուժի՝ «Ազատ հայրենիք» կուսակցության նախաձեռնությամբ կազմակերպած՝ «Հայրենիք» երիտասարդական ճամբարը:
«Հայրենիք» երիտասարդական ճամբարը նոր շարունակություն է ունենալու. հավաստում է պատասխանատուն
ՍՏԵՓԱՆԱԿԵՐՏ, 31 օգոստոսի, ԱՐՑԱԽՊՐԵՍ: ԱՀ կուսակցության երիտասարդական թևի պատասխանատուներից Գոռ Բալասանյանը «Արցախպրես»-ի հետ զրույցում նշեց, որ ռազմահայրենասիրական ուղղվածությամբ՝ 3 հերթափոխով ճամբարին մասնակցել են ավելի քան 150 երիտասարդներ ու պատանիներ՝ հանրապետության բոլոր շրջաններից:
«Ճամբարականներն այդ օրերի ընթացքում մասնակցել են ազգային և ինտելեկտուալ խաղերի, մասնագետի ուսուցմամբ սովորել են ազգագրական պարեր, այցելել շրջակա պատմաճարտարապետական վայրեր՝ Գտչավանք, Տողի մելիքական ապարանք, մասնակցել են հրաձգության մրցույթի և այլն: Բացի այդ, ճամբար է այցելել Հանրապետության նախագահ Բակո Սահակյանն, ով հանդիպել է երիտասարդների հետ եւ ջերմ ու անմիջական մթնոլորտում զրույց ունեցել տարբեր թեմաների շուրջ»,- ասաց Գ. Բալասանյանը:
Ինչպես հաղորդեցին «Արցախպրես»-ին, ճամբարականներին բազմիցս այցելել է նաև ԱՀ կուսակցության ղեկավար, հանրապետության վարչապետ Արայիկ Հարությունյանը, ով երիտասարդների հետ խոսել է ոչ միայն ներկուսակցական, այլև երիտասարդության հուզող խնդիրների մասին:
Գ. Բալասանյանը գոհունակություն հայտնեց երիտասարդների ժամանցն ու հանգիստը առավել արդյունավետ ու հագեցած դարձնելուն նպատակաուղղված ճամբարի արդյունքներից: Նա նաև նշեց, որ ճամբարի կազմակերպումը ոչ միայն շարունակական բնույթ է կրելու` նպաստելով երիտասարդների համախմբվածությանը, այլև տարբեր նոր ծրագրերի տեսքով շարունակություն է ունենալու:
ԱՀ կուսակցության երիտասարդական թևի պատասխանատուն հավաստեց, որ ճամբարային օրերը հագեցած էին ոչ միայն հայրենաճանաչողության ու ռազմահայրենասիրական միջոցառումներով, այլև հնարավորություն են ընձեռել մասնակիցներին անմիջական մթնոլորտում Արցախի բարձրաստիճան պետական այրերի հետ հանդիպումների ժամանակ իրենց հուզող հարցերն ու առաջարկները բարձրաձայնել:
