Արցախում բարեգործական ներդրումներ իրականացնող Լիբանանի ARI (Artsakh Roots Investment) կազմակերպության խորհրդի անդամները և մի խումբ գործարարներ ԼՂՀ վարչապետ Արա Հարությունյանի հետ մեկտեղ երեկ այցելել են Քաշաթաղի շրջանի Աղավնոյի համայնք։
Աղավնոյում բնակելի թաղամաս է կառուցվում
Արցախում բարեգործական ներդրումներ իրականացնող Լիբանանի ARI (Artsakh Roots Investment) կազմակերպության խորհրդի անդամները և մի խումբ գործարարներ ԼՂՀ վարչապետ Արա Հարությունյանի հետ մեկտեղ երեկ այցելել են Քաշաթաղի շրջանի Աղավնոյի համայնք։
«Արցախպրես»-ի հաղորդմամբ, ARI-ի ու ԼՂՀ կառավարության և Արցախի ներդրումային Հիմնադրամի միջև կնքված եռակողմ պայմանագրի համաձայն՝ այդտեղ կառուցվում է 150 տնից բաղկացած բնակելի թաղամաս՝ իր ենթակառուցվածքներով:
ԼՂՀ վարչապետը և կազմակերպության խորհրդի անդամները տեղում ծանոթացել են բնակելի թաղամասում շինարարական աշխատանքների ընթացքին, որից հետո հանդիպում ունեցել Աղավնոյի բնակիչների հետ։
Հանդիպմանը վարչապետ Արա Հարությունյանը, կազմակերուպության անդամներին և Աղավնոյի բնակիչներին շնորհավորելով ծրագրի հաջող ընթացքի կապակցությամբ, գոհունակությամբ նշել է, որ ավելի քան 7 տարի է, ինչ լիբանանահայերի բարեգործական կազմակերպությունը ծրագրեր է իրականացնում Քաշաթաղի շրջանում։ Վարչապետն ընդգծել է, որ ARI-ի ներդրումների միջոցով ստացված արտոնյալ երկարաժամկետ վարկերը Քաշաթաղի և Շահումյանի շրջանների տասնյակ ընտանիքների հնարավորություն են ընձեռել ձեռք բերել ապրուստի միջոցներ, իսկ հետագայում նախատեսվող տնտեսական ներդրումները շատ ընտանիքների համար մշտական եկամտի աղբյուր կծառայեն։
Կառավարության ղեկավարը տեղեկացրել է, որ վերաբնակեցվող շրջաններում բնակարանաշինության գործընթացը շարունակական գործընթաց է։ Ներկայումս ընթացքի մեջ են Քաշաթաղի շրջանի Իշխանաձորի համայնքում սիրիահայ ընտանիքների համար նախատեսվող 28 բնակարանների կառուցման աշխատանքները։ Շարունակական է լինելու նաև շինանյութերի տրամադրումը՝ բնակարանների վերանորոգման և կենցաղային պայմանների բարելավման նպատակով, որի համար այս տարի տրամադրվել է մոտ 250 միլիոն դրամ։ Սոցիալ-տնտեսկան ոլորտներում կատարվող և նախատեսվող շարունակական ներդրումները, վարչապետի խոսքով, շրջանին կայուն տեմպերով զարգանալու հնարավորություն կտան։
ARI ընկերության խորհրդի նախագահ Սուրեն Սարգսյանն իր հերթին նշեց, որ իրենց ներդրումները նպատակ են հետապնդում հնարավորինս նպաստելու Քաշաթաղի և Շահումյանի շրջանների վերաբնակեցման գործընթացին։
Հանդես գալով հանդիպմանը, Աղավնոյի համայնքի ղեկավար Մյասնիկ Մաթևոսյանը կարևորեց ARI կազմակերպության աջակցությունը բնակիչների սոցիալ-կենցաղային պայմանների բարելավման գործում։
Նշենք, որ Աղավնոյում նախատեսված բնակելի թաղամասում 50 տան շինարարությունն արդեն ընթացքի մեջ է, ընդ որում՝ դրանցից 30-ի կառուցման աշխատանքներն ավարտական փուլում են գտնվում և կտրամադրվեն համայնքի կարիքավոր և բազմազավակ ընտանիքներին։ Բնակավայրի բարեկեցիկ կյանքի և լրացուցիչ աշխատատեղերի ապահովման համար կկառուցվեն նաև ջերմոց, գյուղմթերքների ընդունման կետեր, մանկապարտեզ, գյուղապետարան, ձկնաբուծարան և խաղահրապարակներ։
Խոսելով Աղավնո համայնքում իրականացվող շինարարական աշխատանքների ընթացքի մասին, քաղաքաշինության նախարար Կարեն Շահրամանյանը հայտնեց, որ ծրագրի իրականացման առաջին փուլում նախատեսված է կառուցել 50 տուն, որից 25-ը մեկ հարկանի՝ 2 ննջասենյակով, իսկ մնացածը 2 հարկանի՝ 3 ննջասենյակով։ Շինարարական աշխատանքներում ներգրավված են 10 կապալառու կազմակերպություններ՝ մոտ 100 շինարարներով։ Նախարարի հաղորդմամբ՝ առաջին փուլում կառուցվող տների պայմանագրային արժեքը կազմում է 1 միլիարդ 111 միլիոն դրամ, որից 924 միլիոնի ներդրումը կատարելու է ARI կազմակերպությունը, իսկ մյուս մասը՝ ԼՂՀ կառավարությունը։ Միևնույն ժամանակ, ընդհանուր բարեկարգման և ենթակառուցվածքների կառուցման աշխատանքների համար պահանջվող մոտ 500 միլիոն դրամ գումարը ևս կհատկացնի ԼՂՀ կառավարությունը։
Այնուհետև լիբանանահայ գործարարների խումբն ուղևորվել է Քաշաթաղի շրջանի Կովսական համայնք, որտեղ ARI կազմակերպության բարեգործական ծրագրով նախատեսված կովերի հերթական գլխաքանակը նվիրաբերվեց երեք և ավելի անչափահաս երեխաներ ունեցող 150 ընտանիքի։
