Արցախի հասարակական կազմակերպությունները (ՀԿ) բավականին ներգրավված են պետական կառավարման գործում, մասնակցում են նոր օրենքների քննարկմանը և պետության զարգացմանն ուղղված կարևոր գործընթացներին:
Մեծ են Արցախում գործող հասարակական կազմակերպությունների դերն ու նշանակությունը
ՍՏԵՓԱՆԱԿԵՐՏ, 19 սեպտեմբերի, ԱՐՑԱԽՊՐԵՍ։ Այս մասին «Արցախպրես»-ի թղթակցի հետ զրույցում ասել է ԼՂՀ մշակույթի և երիտասարդության փոխնախարար Գայանե Գրիգորյանը մեզ հետ զրույցում տեղեկացրել է.
«Այսօրվա դրությամբ Արցախում գործում է ավելի քան 15 երիտասարդական հասարակական կազմակերպություն:
ՀԿ-ներն զբաղվում են տարբեր ոլորտներով` ռազմահայրենասիրական դաստիարակությամբ, առողջ ապրելու քարոզչությամբ, ոչ ֆորմալ կրթության խթանմամբ և այլն:
Հասարակական կազմակերպություններն ստեղծված են աշխատելու երիտասարդների հետ, կազմակերպելու և իրագործելու տարաբնույթ միջացառումներ` խթանելու համար մեծ թվով երիտասարդների ներգրավմանը, նրանց ակտիվության բարձրացմանը և այլն: Այս տեսակետից Արցախում գործող երիտասարդական ՀԿ-ների գործունեությունն անգնահատելի է:
Մենք համագործակցում ենք երիտասարդական հասարակական կազմակերպությունների հետ` աջակցելով նրանց կողմից իրագործվող ծրագրերին, այսինքն` տրամադրելով նաև ֆինանսական աջակցություն»:
ԼՂՀ վարչապետի օգնական Վլադիմիր Գրիգորյանը, ով զբաղվում է նաև հասարակական կազմակերպությունների հետ կապերի հարցով նշել է, որ հասարակական կազմակերպություններն Արցախի Հանրապետությունում մեծ դեր են կատարում քաղաքացիական հասարակության ձևավորման և կայացման գործում:
Ըստ Վ. Գրիգորյանի` Արցախի Հանրապետության առանձնահատկություններից ելնելով` Արցախում գործող հասարակական կազմակերպությունները, համագործակցելով տարբեր պետական կառույցների հետ, ակտիվ գործունեություն են ծավալում հանրապետության ողջ տարածքում:
«Հասարակական կազմակերպության անդամները և ղեկավարները, կարևորելով մեր պետության պաշտպանությունն ու անվտանգությունը, իրենց ծրագրերում մեծ տեղ են հատկացնում ռազմահայրենասիրական դաստիարակությանը, ինչը, միանշանակ ողջունելի է: Վերջին շրջանում նկատվում է ակտիվ համագործակցություն Արցախի ՀԿ-ների և ԼՂՀ մարդու իրավունքների պաշտպանի գրասենյակի միջև` իրականացնելով տարաբնույթ քննարկումներ: Հանդիպում-քննարկումներ են կազմակերպվում նաև ՀՀ-ից հրավիրված մարդու իրավունքների բնագավառում ակտիվ գործունեություն ծավալող հասարակական և պետական գործիչների միջև:
Թե´ ԼՂՀ կառավարությունը և´ թե մնացած պետական կառույցները բաց են հասարակական կազմակերպությունների ներկայացուցիչների առջև. բարձրացվում են տարաբնույթ հարցեր ու խնդիրներ, առաջարկվում դրանց լուծման տարբերակներ:
Պետությունը տարիների ընթացքում ստեղծել է բավարար պայմաններ, որպեսզի ՀԿ-ները կարողանան ազատ ծավալվել և իրականացնել իրենց հիմնական կանոնադրային ծրագրերը, որոնք միտված են մեր պետության պաշտպանությանը, շենացմանն ու զարգացմանը:
Արցախի ՀԿ-ները և նրանց ներկայացուցիչներն ակտիվորեն ներգրավված են միջազգային տարբեր ծրագրերում: Դրանք ևս իրենց հերթին խթան են հանդիսանում Արցախի Հանրապետության միջազգային ճանաչման գործընթացին»,- ասել է Վ. Գրիգորյանը:
