Սեպտեմբերի 13-22-ը ԼՂՀ մարզական պատվիրակությունը հաջող ելույթ է ունեցել Իրանի Իսլամական Հանրապետության մայրաքաղաք Թեհրանում անցկացած իրանահայերի Հայ մշակութային «Արարատ» կազմակերպության (ՀՄԱԿ) անցկացրած 48-րդ համահայկական խաղերին:
Արցախի մարզական թիմը Թեհրանում անցկացված 48-րդ համահայկական խաղերին հաջող է ելույթ ունեցել
ՍՏԵՓԱՆԱԿԵՐՏ, 21 սեպտեմբերի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում տեղեկացրել է ԼՂՀ կրթության գիտության և սպորտի նախարարության աշխատակազմի սպորտի վարչության պետ Աշոտ Դանիելյանը՝ ընդգծելով, որ Արցախի մարզական թիմը փայլուն է ելույթ ունեցել հատկապես սեղանի թենիսի, շախմատի, թեթև աթլետիկայի մարզաձևերում՝ գրավելով մրցանակային տեղեր:
«Մեր 51 հոգանոց պատվիրակության կազմում ընդգրկված տղա ու աղջիկ մարզիկները թվով 39 էին, որոնք հանդես են եկել մի շարք մարզաձևերով, մասնավորապես՝ բասկետբոլով, սեղանի թենիսով, շախմատով, թեթև աթլետիկայով: Սեղանի թենիս մարզաձևում արցախցի մարզիկները գրավել ենք 6 մարզիկ՝ առաջին և 2-ը երկրորդ, թեթև աթլետիկա մարզաձևում 11-ը՝ առաջին, 13-ը՝ երկրորդ ու երրորդ, իսկ շախմատի առաջնությունում 3-ը՝ առաջին, 2-ը՝ երկրորդ տեղեր: Ընդհանուր առմամբ՝ Արցախի թիմը իրեն փայլուն է դրսևորել համահայկական խաղերին. շատերն են հիացմունքով խոսում մեր ելույթներից»,- ասել է Ա. Դանիելյանը և ընդգծել, որ բոլոր մարզիկներն էլ իրենց ուժերի ողջ լարումով ու պատասխանատվությամբ են մասնակցել Թեհրանում անցկացված 48-րդ համահայկական խաղերին: Որոշ մարզիկներ էլ միանգամից նվաճել են մի քանի մեդալներ (թեթև աթլետիկայում հանդես եկող Աշոտ Հայրապետյանը՝ 2 ոսկե և Ստելա Թամրազյանը՝ 3 ոսկե մեդալներ):
Հայ մշակութային «Արարատ» կազմակերպությունը (ՀՄԱԿ) իրանահայ համայնքի ամենամեծ մարզամշակութային կազմակերպություն է։ Կազմակերպությունը ստեղծվել է 1944 թվականին և մասնաճյուղեր է ունեցել Իրանի տարբեր քաղաքներում, որտեղ եղել է հայ համայնք (Թեհրան, Իսպահան, Թավրիզ, Ուրմիա, Գերդաբադ, Շիրազ, Արաք և Շահին Շահր)։