Բարեգործական հիմունքներով 2004 թվականից ԼՂՀ-ում գործող «Հանգանակ» հասարակական կազմակերպությունը (ՀԿ) իր կազմում ընդգրկված շահառուներին յուրաքանչյուր ամիս շարունակում տրամադրել սոցիալական և բժշկական օգնություն:
«Հանգանակ» ՀԿ-ն իր շահառուներին շարունակում է սոցիալական և բժշկական օգնություն տրամադրել
ՍՏԵՓԱՆԱԿԵՐՏ, 22 սեպտեմբերի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է «Հանգանակ» հասարակական կազմակերպության ղեկավար Գոհար Հովհաննիսյանը` նշելով, որ կազմակերպությունում ընդգրկված են 63 և ավելի բարձր տարիք ունեցող կենսաթոշակառուներ. նրանք միայնակ ծերեր են. շատերը նույնիսկ խնամակալներ էլ չունեն:
«ՀԿ-ում ընդգրկված է 200 շահառու, որից 25-ն անկողնային հիվանդներ են և մշտապես գտնվում են մեր կազմակերպության ուշադրության և հսկողության ներքո:-ասել է Գ. Հովհաննիսյանը և մանրամասնել,-Այդ տարեցներից շատերը կրել են Արցախյան պատերազմի ծանր արհավիրքները` կորցնելով թե´ իրենց առողջությունը և թե´ հարազատներին: Մնալով միայնակ` նրանք մարդկային ջերմության, մտերմության, հոգատարության, աջակցության կարիք են զգում: Ինչ խոսք, սոցիալական տարբեր ծրագրերի շրջանակներում պետությունը նրանց միայնակ ու անօգնական չի թողնում և հնարավորինս աջակցում է` փորձելով թեթևացնել նրանց հոգսերը:
Տարեցների առօրյան հետաքրքիր դարձնելու համար հաճախ ենք կազմակերպում էքսկուրսիաներ դեպի Արցախի տեսարժան վայրեր: Այնտեղ կազմակերպում ենք նաև բացօթյա ճաշկերույթ: Այդպիսի մտերմիկ միջավայրում անցկացրած ժամերը նրանց երանության պահեր են պարգևում. նրանք նման պահերին մոռանում են իրենց` ծեր, միայնակ ու անօգնական լինելը:
Հոկտեմբերի 1-ին` Տարեցների միջազգային օրվան նվիրված, մեր կազմակերպության մի խումբ անդամների անակնկալ է սպասվում. մեր տարեցները կայցելեն Արցախի ամենատարեց «Տնջրե» ծառ կողչվող վայրը»:
ՀԿ-ի ղեկավարի ընդգծմամբ` կազմակերպության գլխավոր նպատակն է, որ իրենք «Հանգանակ»-ի մասնաճյուղեր ունենան նաև Արցախի շրջաններում:
«Ուրախություն բոլորիս` «Հայաստան» համահայկական հիմնադրամի կողմից ընթացիկ տարում տրամադրված ողջ նվիրատվությունը տրամադրվել է Շուշիում նոր պիլոտային ծրագիր սկսելուն, որտեղ արդեն ընդգրկված կա 26 տարեց»,-հավելել է Գ. Հովհաննիսյանը:
Մեզ հետ զրույցում մի շարք կենսաթոշակառուների անունից «Հանգանակ» ՀԿ-ի անդամ 66-ամյա Լաուրա Սևյանն իր շնորհակալություն է հայտնել կազմակերպության աշխատողներին` նրանց հոգատարության, բժշկական, սոցիալական և հոգեբանական աջակցության համար և անկեղծացել. ««Հանգանակ»-ը մեզ համար հարազատ միջավայր է: Մասնակցում ենք համերգների, էքսկուրսիաների, ավելի մոտիկից ծանոթանում միմյանց, սատարում իրար: Այդպիսի շփումները մտերմացնում է մեզ, կապում իրար, դարձնում հարազատ: Չէ որ «Հանգանակը» կարծես յուրօրինակ հարազատ տուն է մեզ համար»: