Այսօր Ստեփանակերտի Մեսրոպ Մաշտոցի անվան քաղաքային գրադարանում տեղի է ունեցել արցախցի գրող, լրագրող, թարգմանիչ Աշոտ Բեգլարյանի «Поцелованный ангелом» (Հրեշտակից համբուրվածը) գեղարվեստական-վավերագրական գրքի շնորհանդեսը:
Ստեփանակերտում տեղի է ունեցել Աշոտ Բեգլարյանի գրքի շնորհանդեսը
ՍՏԵՓԱՆԱԿԵՐՏ, 30 սեպտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ` միջոցառմանը բացման խոսքով հանդես է եկել Ստեփանակերտի համար 7 հիմնական դպրոցի ռուսաց լեզվի ուսուցչուհի Վերա Խաչատուրյանը, ով ողջունելով ներկաներին նշել է, որ գիրքը լույս է տեսել 2016 թվականին Մոսկվայում:
«Աշոտ Բեգլարյանի գրիչն ընդգրկուն առանձնահատկություններ ունի, որոնցով նա աշխարհին ներկայացնում է Արցախի ազատագրական պայքարն ու մտահոգությունները, սակայն «Поцелованный ангелом» գիրքն իր ոճով առանձնանում է»,-ասել է Վ. Խաչատուրյանը:
Աշոտ Բեգլարյանը նշել է, որ գիրքն արմատներով արցախցի, տաղանդավոր պատանի երգիչ Ֆելիքս Քարամյանի մասին է:
«Ֆելիքսը զարմանահրաշ պատանի է: Իր եզակի վոկալ ունակություններով նա դարձել է իտալացի հայտնի երգիչ Ռոբերտինո Լորետտոյի առաջին ուսանողը: Նրա փոփոխական ճակատագիրն արժանի է առանձնակի ուշադրության: Այս ամենն էլ պատճառ հանդիսացավ գրելու այս գիրքը, որը տաղանդաշատ երգիչ Ֆելիքսի կյանքի, ստեղծագործական ուղու, երազանքների ու ցանկությունների մասին է պատմում»,- մասնավորապես ասել է Ա. Բեգլարյանը և հույս հայտնել, որ գիրքը կունենա շարունակություն:
Ֆելիքս Քարամյանն իր խոսքում նշել է, որ ուրախ ու հպարտ է, որ ապրում է Արցախում և հիացած է Արցախի տեսարժան վայրերով ու հյուրասեր մարդկանցով:
Միջոցառմանը ցուցադրվել է Ֆելիքս Քարամյանի լուսանկարների սլայդշոու:
Շնորհանդեսին Արցախի պետական համալսարանի ուսանողները հանդես են եկել բանաստեղծություններով, որին հաջորդել են ներկաների շնորհավորական ելույթները:
Նշենք, որ Աշոտ Բեգլարյանը ծնվել է 1968 թվականին, Ստեփանակերտում։ Սովորել է Երևանի պետական համալսարանի ռուսաց լեզվի և գրականության ֆակուլտետում։ Տպագրվում է 19 տարեկանից։ Ստեղծագործում է հիմնականում ռուսերեն։ Ա. Բեգլարյանի պատմվածքներն ու ակնարկները հրապարակվել են գրական, հասարակական-քաղաքական հրատարակչություններում Ստեփանակերտում, Երևանում, Մոսկվայում, Սանկտ Պետերբուրգում, Դոնի Ռոստովում, Նովոչերկասկում, Նիժնի Նովգորոդում, Տոմսկում, Աբխազիայում, Վրաստանում, Ղազախստանում,Ուկրաինայում, Բելառուսիայում, Բուլղարիայում, Սլովակիայում, Կանադայում, ԱՄՆ-ում, Մեծ Բրիտանիայումև այլն։
Աշոտ Բեգլարյանը հանդիսանում է տասնյակ գրքերի թարգմանիչ և խմբագիր։Ռուսաստանյան ազգային գրական «Տարվա գրող» 2015 և 2016 թվականների մրցանակի դափնեկիր է:
