Ֆրեզնոյում Հայաստանի Հանրապետության պատվավոր հյուպատոսարանի նախաձեռնությամբ և տեղի հայկական համայնքի օժանդակությամբ մի խումբ արտասահմանյան բժիշկների կողմից, Ստեփանակերտում այսօր՝ ժամը 11:00-ից իրականացվում է «Բաց դռների օր» ծրագիրը:
Արտասահմանյան մի խումբ բժիշկներ Ստեփանակերտում անվճար վիրահատություններ են կատարում
ՍՏԵՓԱՆԱԿԵՐՏ, հոկտեմբերի 10, ԱՐՑԱԽՊՐԵՍ։ ԼՂՀ առողջապահության նախարարության «Հանրապետական բժշկական կենտրոն» ՓԲԸ-ի պոլիկլինիկական բաժանմունքում թերապևտների, ընդհանուր և դիմածնոտային վիրաբույժների, ակնաբույժների, «Մոր և մանական առողջության պահպանման կենտրոն» ՓԲԸ-ում նեոնատոլոգի և մանկաբարձ-գինեկոլոգների, «Արևիկ» մանկական բուժմիավորում` մանկաբույժների և «Դենտեքս Դենտալ գրուպ» ատամնաբուժական կլինիկայում ատամնաբույժների կողմից իրականացվում են բնակչության անվճար խորհրդատվություններ, անհրաժեշտ դեպքում կատարվում են նաև վիրահատական միջամտություններ:
«Արցախպրես»-ի թղթակցի հետ զրույցում Ֆրեզնոյում ՀՀ պատվավոր հյուպատոս Պերճ Աբգարյանը նշել է, որ իրենց խմբում ներգրավված է 29 բժիշկ. նրանք եռօրյա այցով Արցախ են ժամանել, որպեսզի բժշկական օնություն ցուցաբերեն արցախցիներին:
«Մեր խումբը բժշկական օգնություն է ցուցաբերել ՀՀ-ի տարբեր շրջաններում ևս: Ամենակարևորն այն է, որ դիմածնոտային խնդիրներ ունեցող վիրավոր զինվորներին ենք օգնություն ցուցաբերել: Մենք մեր նման քայլով փորձել ենք փոքր-ինչ օգտակար լինել Արցախի ժողովրդին: Պայմանավորվածություն ենք ձեռք բերել նաև, որ տեղի բժիշկները ցանկացած հարցով համացանցի միջոցով կապի մեջ լինեն Ֆրեզնոյի մեր մասնագետների՝ հետ»,-ասել է Պերճ Աբգարյանը և տեղեկացրել, որ իրենք հանդիպել են ԼՂՀ առողջապահության նախարար Կարինե Աթայանի հետ և միասին քննարկել իրենց հետագա անելիքները:
«Յունիվերսալ բիոֆարմա» կազմակերպության ներկայացուցիչ, ակնաբույժ Քուլդիպ Թուսուն հանրապետական բժշկական հիվանդանոցին է նվիրաբերել ժամանակակից «Ռետինոսկոպ» (աչքի հատակը ուսումնասիրելու համար նախատեսված սարք), որի միջոցով տեղի բժիշկները կարող են նկարել աչքի հատակը: Ստացված նկարը կարող են ուղարկել Ֆրեզնոյի ակնաբույժներ Քուլդիպ Թուսունին և Պաբլու Կուադրոսին, որոնք էլ անվճար կախտորոշեն հիվանդությունը և կտան համապատասխան բուժում:
Այս սարքի օգնությամբ հնարավոր կլինի կանխել շաքարի հետևանքով առաջացող կուրությունը: Մեր նման համագործակցությունը լինելու է շարունակական:
Մեզ համար մեծ պատիվ է լինել Արցախում և բնակիչներին ցուցաբերել համապատասխան բժշկական օգնություն,-ընդհանրացրել է խոսքը և հավելել,- որ ֆրեզնոյի հայկական համայնքն այնքան շատ բան է արել Ամերիկայի համար, որ մենք մեզ պարտավորված ենք զգում և որպես փոքրիկ պատասխան նրանց արած մեծ գործի, նվիրաբերում ենք նրանց համերկրացիներին աչքի՝ նման եզակի սարքավորում»:
Գինեկոլոգ Ջեֆ Թոմասն էլ իր խոսքում նշել է, որ անցյալ տարի ինքը եղել է Երևանում, Գյումրիում, Աշտարակում, բայց հնարավորություն չի ունեցել այցելելու Արցախ:
«Ես ևս ուզում եմ իմ ներդրումը բերել Արցախին:
Ես այստեղ եմ, որ իրականացնեմ վիրահատություններ, և իմ խորհուրդներով օգնեմ տեղի բնակչությանը, և բժիշկների հետ էլ կատարելով փորձի փոխանակում»,-ասել է Ջեֆ Թոմասը:
Ընդհանուր և լապորասկոպիկ վիրաբույժ Վան Պողոսյանն ևս առաջին անգամ է Արցախում: Մեզ հետ զրույցում Վան Պողոսյանն ասել է. «Ես մեր խմբի հետ այստեղ վիրահատություններ եմ իրականացնում: Հիմնականում մեզ դիմել են լեղապարկի քարերի, ճողվածքի (գրիժա) հեռացման համար: Գտնում եմ, որ պետք է ոչ թե կտրվածքով վիրահատում իրականացվի, այլ ժամանակակից ձևով՝ լապորասկոպիկ տարբերակով: Նման վիրահատություններն առանց պատռվածքի ու ցավի է լինում, և հիվանդը շուտ էլ ապաքինվում է»:
«Covidien» բժշկական սարքավորումների ընկերության ներկայացուցիչ, վիրաբույժ Անիբալ Ռոդրիգեսն, իրենց ընկերության կողմից արցախցիներին է նվիրաբերել բժշկական սարքավորումներ, որոնց օգտագործման ձևերն ու եղանակը նա սովորեցրել է արցախցի բժիշկներին:
Նշենք նաև, որ մարդասիրական առաքելությամբ իրենց գործը փայլուն կատարող արտասահմանյան բժիշկները հիացած են թե´ Արցախ աշխարհով և թե´ նրա հերոսական ժողովրդով: