Հոկտեմբերի 20-ին Երևանում մեկնարկող լրագրողների 8-րդ համահայկական համաժողովը հոկտեմբերի 23-24-ը իր աշխատանքները կշարունակի Ստեփանակերտում:
Ստեփանակերտում կայանալիք լրագրողների 8-րդ համահայկական համաժողովին կաջակցի «Ղարաբաղ Տելեկոմ»-ը
ՍՏԵՓԱՆԱԿԵՐՏ, հոկտեմբերի 20, ԱՐՑԱԽՊՐԵՍ: Ինչպես «Արցախպրես»-ին հայտնեցին ՀՀ սփյուռքի նախարարությունից, «Հայոց պետականությունը՝ միասնության առանցք» խորագրով լրագրողների 8-րդ համահայկական համաժողովին կմասնակցեն Հայաստանի, Սփյուռքի և Արցախի լրատվամիջոցների ղեկավարներ ու լրագրողներ, օտարալեզու հայկական և ոչ հայկական ԶԼՄ-ներում աշխատող հայ լրագրողներ:
Համաժողովի թեմատիկ ուղղություններն են` «Սփյուռքի ներգրավման միջոցները ՀՀ պետականաշինության աշխատանքներում», «ՀՀ դիվանագիտական - Սփյուռքի հասարակական կազմակերպություների համագործակցության ուղիները», «Տեղեկատվական միացյալ համակարգի նախադրյալները և համապատասխան մեխանիզմները», «Համահայկական ներուժի հավաքագրում և ուղղորդում դեպի Հայոց պետականության ամրապնդում», «Սփյուռքյան կառույցները՝ կամուրջ ՀՀ և տարբեր պետությունների հարաբերությունների զարգացման գործում», «Սփյուռքը ՀՀ-ին զորակից` Արցախի Հանրապետության միջազգային ճանաչման աշխատանքներում» և «Հայաստան-Արցախ-Սփյուռք` 25-ամյա համագործակցության հանրագումարները և հետագա անելիքները»:
Լրագրողների 8-րդ համահայկական համաժողովը կազմակերպվում է Հայաստանի ժուռնալիստների միության, Լրատվամիջոցների համահայկական ընկերակցության, Լրագրողների համահայկական համաժողովները համակարգող խորհրդի և ՀՀ սփյուռքի նախարարության աջակցությամբ:
Ի դեպ, Արցախում համաժողովի աշխատանքներին իր աջակցությունն է հայտնել «Ղարաբաղ Տելեկոմ» ընկերությունը:
Ինչպես «Արցախպրես»-ին տեղեկացրին ընկերության մամլո գրասենյակից, համաժողովի անցկացման դահլիճը (Ստեփանակերտի մշակույթի պալատ) կապահովվի անվճար համացանցով, ռեալ IP հասցեով, իսկ համաժողովի ընթացքում սփյուռքի լրատվամիջոցների ղեկավարներին ու լրագրողներին կտրամադրվեն կանխավճարային հեռախոսահամարներ՝ Արցախի տարածքում շփումը միմյանց հետ ապահովելու համար:
