ԼՂՀ նախագահին առընթեր սահմանադրական բարեփոխումների մասնագիտական հանձնաժողովի անդամները հանրային քննարկումները երեկ՝ նոյեմբերի 15-ին, շարունակել են Ասկերան քաղաքում:
Ասկերանի հանրությանն է ներկայացվել սահմանադրական բարեփոխումների նախագիծը
ՍՏԵՓԱՆԱԿԵՐՏ, 16 նոյեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ` հանրային քննարկումներին բացման խոսքով հանդես է եկել ԼՂՀ նախագահին առընթեր սահմանադրական բարեփոխումների մասնագիտական հանձնաժողովի անդամ, ԼՂՀ գերագույն դատարանի նախագահ Նարինե Նարիմանյանը, ով կարևորել է Սահմանադրության փոփոխությունները, և հորդորել ներկաներին, որպեսզի ակտիվ մասնակցություն ունենան նախագծի քննարկմանը, ինչպես նաև հանդես գան հիմնավորված առաջարկություններով:
Ի՞նչ է տալու Արցախի Հանրապետությանը փոփոխված Սահմանադրությունը. հաճախ հնչող այս հարցին ի պատասխան՝ Նարինե Նարիմանյանն ասել է. «Սահմանադրական բարեփոխումների ճանապարհը ընտրել են մեր քաղաքական ուժերը: Համոզված ենք, որ կատարվելիք փոփոխությունների արդյունքում ունենալու ենք ավելի անկախ, արդյունավետ հանրային իշխանություն: Կատարելագործվելու է օրենսդիր, գործադիր և դատական իշխանությունների հավասարակշռությունը»:
Քննարկման ընթացքում ԼՂՀ նախագահին առընթեր սահմանադրական բարեփոխումների մասնագիտական հանձնաժողովի անդամները պատասխանել են նաև ներկաների հարցերին, տվել պարզաբանումներ՝ նախագծի որոշ կետերի մասով, որոնք հիմնականում վերաբերում էին տնտեսական, սոցիալական և մշակութային ոլորտներին, նախագահի լիազորություններին, մարդու և քաղաքացու հիմնական իրավունքներին ու ազատություններին, ինչպես նաև տեղական ինքնակառավարման մարմինների ընտրության կարգին՝ համայնքների խոշորացմանը:
«Արցախպրես»-ի թղթակցի հետ զրույցում Ասկերանի շրջվարչակազմի աշխատակազմի ղեկավար Արթուր Մելքումյանն ասել է.
«Սահմանադրության փոփոխությունները միանշանակ կունենան դրական տեղաշարժ, քանի որ մեր երկրի ներկայիս իրավիճակն է թելադրում, որ անցնենք խիստ նախագահական կառավարման համակարգին:
Իմ կարծիքով, հանրությունն ակտիվ մասնակցություն կունենա հանրաքվեին և իր «Այո»-ն կասի նոր Սահմանադրությանը»: