Մենք հարգում ենք Հայաստանի ընտրությունը՝ համագործակցել և՛ ՆԱՏՕ-ի, և՛ Ռուսաստանի և՛ իր անմիջական հարևանների հետ, ունենալ բարիդրացիական հարաբերություններ:
ՆԱՏՕ-ի հետ համագործակցությունը Հայաստանին չի դարձնում հակառուսական. Ջեյմի Շի
ՍՏԵՓԱՆԱԿԵՐՏ, 16 նոյեմբերի, ԱՐՑԱԽՊՐԵՍ: Tert.am-ի հետ զրույցում ասաց ՆԱՏՕ-ի գլխավոր քարտուղարի փոխօգնական Ջեյմի Շին՝ նշելով, որ խոսքը ՀԱՊԿ-ի և Եվրասիական տնտեսական միության մասին է:
«Իմ ուղերձն այն է, որ այստեղ «կամ-կամ»-ի մասին չէ խոսքը, այլ՝ «և-և»-ի: Լրիվ հնարավոր է, անգամ ցանկալի է, որ Հայաստանն այս պայմաններում նաև ՆԱՏՕ-ի հետ սերտ հարաբերություններ մշակի ու պահպանի: Բոլորովին պարտադիր չէ ՆԱՏՕ-ի անդամ լինել, որպեսզի կարողանաս օգտվել ՆԱՏՕ-ի հետ համագործակցության բազմաթիվ ծրագրերից»,- նշեց Շին:
Ըստ նրա՝ այսօրինակ համագործակցությամբ մեր թե՛ Հայաստանի, թե՛ ՆԱՏՕ-ի համար անվտանգությունը շահում է, զարգանում:
Tert.am-ի հարցին, թե ի՞նչ դիրքորոշում ունի ՆԱՏՕ-ն այս տարածաշրջանում Ռուսաստանի դերի մեծացման մասին, արդյոք անհանգստացած չէ՞ այն փաստով, որ ՀԱՊԿ-ի շրջանակներում ստեղծվում է հակաօդային պաշտպանության միասնական համակարգ կամ համատեղ զորախումբ, Ջեյմի Շին պատասխանեց, որ ՆԱՏՕ-ն պաշտպանական բնույթի դաշինք է և երբևէ չի սպառնացել ու չի սպառնալու որևէ մեկին:
Դիտարկմանը, թե կարծիքներ կան, որ ՌԴ-ն ամրացնում է իր դիրքերը հենց ՆԱՏՕ-ին դիմագրավելու համար, նա պատասխանեց. «ՆԱՏՕ-ի գոյության իմաստն իր անդամների անվտանգությունը պահպանելն է: Ինչ արվում է՝ համաչափ է, չափի մեջ՝ երկխոսության ձեռք մեկնելով մնացածներին: ՆԱՏՕ-ն երբևէ չի արել մի բան ու մտադիր էլ չի անել այնպիսի քայլեր, որը կարդարացնի իր դեմ սադրիչ գործողությունները»։
Ջեյմի Շին հիշեցրեց, որ տարիներ առաջ Ռուսաստանի Դաշնության հետ ՆԱՏՕ-ն սերտորեն համագործակցում էր, բայց իրավիճակը փոխվեց:
«Մի քանի տարի առաջ մենք ՌԴ հետ ունեինք լավ համագործակցություն, միասին՝ Բալկաններում էինք, ՌԴ-ն մեզ սատարում էր Աֆղանստանում, օրինակ՝ թմրադեղերի շրջանառությունը կանխելու հարցում, բայց, երբեմն, մենք մոռանում ենք, որ հենց ՌԴ ապօրինի բռնակցման նախաշեմին էր, որ Միջերկրական ծովում ուր որ է պետք է իրականացվեր ռազմական գործողություն, որը կոչված էր օգնելու Սիրիայի քիմիական զենքի ոչնչացմանը: ՌԴ ՆԱՏՕ խորհրդի շրջանակներում երկխոսությունը հիմա էլ շարունակվում է: Բրյուսելում հաջորդ շաբաթ ժողով է սպասվում: Ուզում եմ ասել, որ այն ընթացքում, մինչ ՆԱՏՕ-ն օրինական իրավունք ունի իրեն պաշտպանելու Ռուսաստանի դեմ, դրան զուգընթաց երկխոսություն է ընթանում, փորձում ենք ՌԴ-ին համոզել, որ անիմաստ ու սին է հակամարտության գնալը, որ կարելի է երկու կողմերի համար արգասաբեր արդյունքի հասնել՝ համագործակցել»,- մանրամասնեց Շին:
ՆԱՏՕ-ի գլխավոր քարտուղարի փոխօգնականի խոսքով՝ Հայաստանի պես երկրներում օրինակ իրենք ի վիճակի են համագործակցել, երբ կա այլ համագործակցություն: «Սա ուղերձ է նաև Ռուսաստանին: ՆԱՏՕ–ի հետ լավ հարաբերությունները երկիրը չեն դարձնում հակառուսական: Ռուսաստանը ՆԱՏՕ-ից վախենալու ոչ մի բան չունի»,- շեշտեց Ջեյմի Շին:
