21-րդ դարում տեղեկատվական հասարակության գլխավոր ակտիվը մարդիկ են, դրա համար է ընթանալու պայքարը, այդ պատճառով կրթությունը չափազանց կարևոր է։ Այդ մասին ռուսական ՏԱՍՍ գործակալությանը տված հարցազրույցում ասել է ռուսաստանաբնակ հայտնի գործարար և բարերար, «Սկոլկովո» մոսկովյան կառավարման դպրոցի համահիմնադիր, UWC Dilijan College-ի հիմնադիր-գործընկեր Ռուբեն Վարդանյանը՝ խոսելով «Սկոլկովո» բիզնես դպրոցի և Դիլիջանում UWC դպրոցի նախագծերի մասին:
Մեզ մեծ փոփոխություններ են սպասվում 2020-ականների կեսերին՝ ԽՍՀՄ-ում մեծացած մարդկանց փոփոխություն. Ռուբեն Վարդանյանի հարցազրույցը ТАСС-ին
«Ռուսաստանը 1990-ականներին կորցրեց ոչ միայն երկրից դուրս հանված մի քանի հարյուր միլիարդ դոլար, հայտնում է Թերթ.ամ-ը:
Ամենավատն այն է, որ այստեղից հեռացան տրիլիոն դոլարի ուղեղներ, արտագաղթեցին Իսրայել, ԱՄՆ, Եվրոպա, Հարավային Կորեա… Հնարավոր է՝ դա է ամենասարսափելի աղետը: Վերջին հաշվով, կրեատիվ մարդկանց 3-5 տոկոսն է առաջընթացի շարժիչը: Նրանց համար էլ ընթանում է ամենալուրջ պայքարը»,-ասել է Ռուբեն Վարդանյանը:
Նա հույս է հայտնել, որ հաջորդ Իլոն Մասկի նման անհատը չի հեռանա Ռուսաստանից, այլ կժամանի Ռուսաստան՝ Ամերիկայի փոխարեն: «Միայն հավատալ և աղոթելը քիչ է, պետք է նաև ինչ-որ բան անել: Գիտեք, ինչպես անեկդոտում՝ «Գոնե վիճակախաղի տոմս գնիր…»: Հարկավոր է անպայման փորձել, չվախենալ սխալվել և հավատալ, որ ամեն ինչ կստացվի»,- ասել է նա:
Ռուբեն Վարդանյանը նշել է, որ բոլորը տեսնում են, թե ինչքան երեխաներ են մեկնում սովորելու Արևմուտք, իսկ իրենց նախագծերն այն մասին են, որ նաև հետխորհրդային տարածքում կարելի է ստեղծել մրցունակ ուսումնական հաստատություններ:
«Մենք ելնում ենք նրանից, որ գոյություն ունի կրթության նոր ձևաչափի պահանջարկ»,- ասել է գործարարը՝ նշելով, որ, միևնույն ժամանակ, նրանք փորձում են երեխաներին ժամանակակից աշխարհի համար այնպիսի կարևոր որակներ փոխանցել, ինչպիսիք են նոր իրականություններին հարմարվելու, ճկուն և արագ փոփոխվելու, այլ մշակույթները հասկանալու և ընդունելու ունակությունները:
«Դիլիջանի մեր դպրոցում սովորում է աշխարհի 72 երկրից երեխա: Ոչ թե տեղի հայեր կամ սփյուռք, այլ ամերիկացիներ, եվրոպացիներ, ավստրալացիներ, Ասիայի և Աֆրիկայի երկրների բնակիչներ… Եվ «Սկոլկովո»-ն մենք գործընկերների հետ ստեղծել ենք որպես բիզնես դպրոց, ուր պետք է ժամանեին օտարերկրացիներ: Մենք հպարտ ենք նաև, որ UWC Dilijan դպրոցի նախագիծը ստացել է միջազգային ճարտարապետական մրցանակներ՝ որպես Եվրոպայում լավագույն հանրային շենք և որպես միտում հաղորդող ճարտարապետություն, ինչպես նաև դարձել է Հայաստանում առաջին նախագիծը՝ հավաստագրված BREEAM կանաչ ստանդարտներով»,- ասել է գործարարը:
Ռուբեն Վարդանյանը պատմել է, որ իրեն հաճախ էին հարցնում, թե ինչու է դպրոց ստեղծում, ինչին նա պատասխանել է, որ ցանկանում է՝ ընտրություն հայտնվի, այդ թվում և իր երեխաների մոտ: «Նախկինում այստեղ այլընտրանք չկար, այժմ կա»,- ասել է նա:
«Ամենամեծ ճոխությունը և ամենամեծ պատասխանատվությունն ընտրության իրավունքն է: Հաճախ մարդիկ վախենում և փախչում են դրանից: Ցանկալի է, որ մեր փոխարեն մեկը կայացնի որոշում, իսկ մենք հետո կարողանանք ասել՝ մենք չենք մեղավոր: Այդ պատճառով ընտրության իրավունքն ամենակարևորն է»,- ասել է գործարարը:
Նա նշել է, որ ծախսած գումարները երբեք չեն վերադառնա շահութաբաժնի տեսքով: «Բայց, եթե գնահատվի երկրի համար կարևորության տեսանկյունից՝ ես ներդրում եմ անում ապագայի մեջ, այդ թվում՝ իմ, և ինչը կարևոր է՝ իմ երեխաների»,- ասել է Ռուբեն Վարդանյանը: Նա հավելել է, որ չնայած հարգում է այն մարդկանց, որոնք օգնում են մահացու հիվանդներին, անօթևան և աղքատ մարդկանց, բայց իրենք զբաղվում են սոցիալական ներդրումներով և հստակ սահմանազատում չեն դնում աշխատանքի և բարեգործության միջև: Նա վստահ է՝ ապագան սոցիալական կապիտալիզմինն է, այդ մոդելը կարող է փրկել աշխարհը: Նման բան արդեն տեղի է ունենում Շվեդիայում, Ֆինլանդիայում, Նորվեգիայում:
Պետք է այնպես ապրել, ասես ամեն ինչ լավ է լինելու, վստահ է Ռուբեն Վարդանյանը՝ նշելով, որ պետք է լինել լավատես, քանի որ այս աշխարհը թողնում ենք երեխաներին…
«Մենք պարտավոր ենք մոլորակն ավելի լավը թողնել, քան ստացել ենք»,- նշել է գործարարը: Նա վստահություն է հայտնել, որ ևս տասը տարուց հասարակությունում մեծ փոփոխություններ են տեղի ունենալու՝ խորհրդային ժամանակ ապրած և մեծացած մարդկանց փոփոխության շնորհիվ:
«Նրանց փոխարեն կգան նորերը: Դա չի նշանակում, որ նրանք ավելի լավն են, պարզապես նրանք նոր են: Մեզ մեծ փոփոխություններ են սպասվում 2020-ականների կեսերին՝ ԽՍՀՄ-ում մեծացած էլիտայի փոփոխություն»,- ասել է նա:
