Այսօր վերաթողարկվել է «Եզնիկ Մոզյան» արհեստագործական ուսումնարան հիմնադրամի կայքը:
Շուշիի տեխնոլոգիական համալսարանի և «Եզնիկ Մոզյան»-ի համագործակցությունը նոր որակ է ստանում
ՍՏԵՓԱՆԱԿԵՐՏ, 24 նոյեմբերի, ԱՐՑԱԽՊՐԵՍ: «Եզնիկ Մոզյան»-ի կայքը՝ Epym.net-ը ժամանակակից տեսքի է բերվել Շուշիի տեխնոլոգիական համալսարանի և «Եզնիկ Մոզյան» արհեստագործական ուսումնարան հիմնադրամի համագործակցության շրջանակներում:
«Եզնիկ Մոզյան» արհեստագործական ուսումնարանի տնօրեն, տեխնոլոգիական համալսարանի հոգաբարձուների խորհրդի անդամ Վասպուրակ Կարապետյանը նշել է, որ հին կայքը երկար ժամանակ չէր աշխատում:
«Մենք փնտրտուքների մեջ էինք. պետք էր լավ մասնագետ գտնեինք որ կարողանայինք մեր կայքը կարգի բերել: Երբ առաջին անգամ տեսա Շուշիի տեխնոլոգիական համալսարանի կայքէջը, շատ ուրախացա. այն շատ պարզ էր ու պրակտիկ, որով կարելի է շատ արագ ուզածդ տեղեկատվությունն ստանալ: Այնուհետև դիմել եմ համալսարանի ռեկտոր Հովհաննես Թոքմաջյանին և նրանից տեղեկացել, որ իր տղան է այն պատրաստել` սիրով ցանկանալով օգնել մեզ»,- ասել է Վ. Կարապետյանը և ընդգծել, որ իրենց համագործակցութունը շարունակակն բնույթ է կրելու:
Կայքէջի պատրաստող, տեխնոլոգիական գիտությունների դոկտոր, տեխնոլոգիական համալսարանի հետազոտական և գիտակրթական կենտրոնի ղեկավար Վաչե Թոքմաջյանը, անդրադառնալով կայքի հնարավորություններին, ասել է. «Այն բերված է այնպիսի մակարդակի, որ անգամ ծրագրավորում և վեբ դիզայն չիմացող մարդն էլ կարող է հանգիստ օգտվել կայքի հնարավորություններից»:
«Շուշիի տեխնոլոգիական համալսարանի ջանքերով վերաթողարկվել ու ժամանակակից տեսքի է բերվել «Եզնիկ Մոզյան» արհեստագործական ուսումնարանի կայքը: Կայքը լինելու է երկու լեզվով՝ հայերեն ու ֆրանսերեն: Այն հնարավորություն է տալու տարածաշրջանի հայալեզու և ֆրանսալեզու լսարանին ծանոթանալու տվյալ հաստատությանը` օգնելով մարդկանց մասնագիտական ճիշտ կողմնորոշում կատարելու: Կայքի օգնությամբ տվյալ ուսումնական հաստատությունը հետագայում կարող է ավելի լավ ներկայացնել իր կողմից կատարված ցանկացած աշխատանք, որովհետև հիմա սոցցանցերն ու ինտերնետ կայքերը տեղեկատվություն փոխանցելու լավագույն միջոցներից են: Շուշիի «Եզնիկ Մոզյան» արհեստագործական ուսումնարանն ազգային արժեք է, և տարածաշրջանում նրա նմանը չկա: Շատ բուհեր կերազեին այսպիսի մակարդակ և հնարավորություններ ունենալ, այդ գործում մեծ է նաև ֆրանսիացի գործընկերների աջակցությունը: «Եզնիկ Մոզյան»-ի զարգացումից է կախված նաև տեխնոլոգիական համալսրանի հետագա զարգացումը»,- մասնավորապես ասել է Վ. Թոքմաջանը:
Վասպուրակ Կարապետյանը խոսելով երկու ուսումնական հաստատությունների համագործակցության մասին, նշել է. «Սա մի միջոց է, որ համատեղ ծրագրերով կարողանանք համընթաց քայլել աշխարհի հետ: Հասարակության մեջ մենք մտածելակերպի փոփոխության խնդիր ունենք: Նախ` կարևորում եմ ինժեներական կրթությունը, որի տակ ես հասկանում եմ նաև գյուղատնտեսականը, երկրորդ` պետք է հասկանանք, որ բարձրագույն կրթությունն սկսվում է դպրոցից, և եթե երեխաներն այն առանց բավարար գիտելիքներով են ավարտում, ոչնչի հասնել չեն կարող: Մենք «Եզնիկ Մոզյան» արհեստագործական ուսումնարանը դիտարկում ենք իբրև ինժեներական կրթության առաջին օղակ, առանց որի ինժեներ դառնալու ճանապարհն ավելի բարդ է լինելու: Պետք է կոտրենք այն կարծրատիպը, թե այստեղ սովորելու են գալիս թույլերը: Մենք թույլերից էլ պիտի կարողանանք լավ մասնագետներ պատրաստել: Երրորդ՝ այս ամենի հիման վրա տարբեր հետազոտությունների միջոցով պետք է խորացնենք մեր գիտելիքները: Կայքն ամենափոքր գործն է, որ մենք ցանկանում ենք մեր երկրում իրականացնել: Մեր ապագան հզոր կրթական համակարգն է»:
