Ավարտվել է սեպտեմբերի 18-ին մեկնարկած «Գրական տապան» միջազգային փառատոնը: Տասնօրյա նավարկությունը աշխարհի 11 երկրներ ներկայացնող գրողների համար դարձել էր Հայաստանը ճանաչելու լավագույն առիթը:
«Գրական տապանն» ավարտել է նավարկությունը
Ավարտվել է սեպտեմբերի 18-ին մեկնարկած «Գրական տապան» միջազգային փառատոնը: Տասնօրյա նավարկությունը աշխարհի 11 երկրներ ներկայացնող գրողների համար դարձել էր Հայաստանը ճանաչելու լավագույն առիթը:
Ինչպես հաղորդում է «Արցախպրես»-ը,փառատոնի մասնակիցներն այս ընթացքում եղել են Հայաստանի գեղատեսիլ վայրերում, այցելել մշակութային օջախներ, հանդիպել հայ ուսանողների և ընթերցողների հետ: Այս մասին հայտնում են «Գրական տապան» փառատոնից:
Տապանի հնաբնակներից Կլաուդիո Պոցանին, ով ներկայացնում է Իտալիան, Հայաստանում տոնել է ծննդյան օրն ու, ինչպես ինքն է ասում՝ «անկախությունը»:
«Ես ու Հայաստանն իրար գտանք միաժամանակ: Ես սիրեցի ձեր երկիրը, այն յուրահատուկ է: Շատ ուրախ եմ, որ հենց այստեղ նշեցի ծննդյանս օրը՝ անկախությունս, անկախ երկրում, ընթերցողների հետ հանդիպման ընթացքում»,- պատմել է Պոցցանին:
Այս տարի, ի դեպ, Կլաուդիո Պոցցանին և Մոլդովան ներկայացնող Վիկա Չեմբարցեվան Մշակույթի նախարարության կողմից արժանացել են «Գրիգոր Նարեկացի» հուշամեդալի՝ «Գրական տապան» միջազգային փառատոնի զարգացման գործում ունեցած ավանդի համար:
«Գրական տապան» փառատոնի առանձնահատկություններից մեկն էլ այն է, որ այն հնարավորություն է տալիս հայաստանյան բուհերի ուսանողներին շփվել արտասահմանցի գրողների հետ, ծանոթանալ նրանց գրականությանն ու ժամանակակից արվեստին:
Այս տարի բուհերի ուսանողները հնարավորություն ունեցան հանդիպելու հանրահայտ բրիտանացի գրող Մեգ Ռոսոֆի, իտալացի Կլաուդիո Պոցցանիի և Ռուսաստանը ներկայացնող Ալիսա Գանիևայի հետ: Իսկ փառատոնի վերջին օրերին հայ ընթերցողների հետ հանդիպել է լեհ հանրաճանաչ գրող Յանուշ Լեոն Վիշնևսկին, ով «Գրական տապան» փառատոնին մասնակցում է արդեն երկրորդ անգամ: Այս տարի նա տապանի շրջանակներում առանձնահատուկ ծրագիր ունի. Հայաստանում հրատարակվել է Վիշնևսկու նոր՝ «Գրանդ» վեպը՝ հայերեն թարգմանությամբ:
Փառատոնի փակման միջոցառումներից սիմվոլիկ էր տապանի մասնակիցների այցը Կոմիտասի անվան պանթեոն: Կոմիտաս վարդապետի հիշատակը հարգելուց հետո, հայ և արտասահմանցի գրողները միացան նաև համաշխարհային յուրօրինակ մի ակցիայի՝ «100 հազար պոետ՝ հանուն փոփոխության»:
«Գրական տապան» փառատոնի ավանդույթների համաձայն՝ այս տարի ևս ընտրվել է տապանի առաջնորդ՝ Նոյը: Այս տարի տապանի Նոյն էր Դանիան ներկայացնող Քեյթ Ռոյսթերը, ով բոլորին հմայել էր իր իմաստնությամբ և բարությամբ: Նա նաև «Կարեն Յեփփեն և հայ ժողովուրդը» գրքի հեղինակն է, որը պատմում է Հայոց ցեղասպանության ու վերապրածների վկայությունների մասին:
Այս 10 օրերի ընթացքում փառատոնի մասնակիցները եղել են ոչ միայն Հայաստանի մարզերում, այլև՝ Արցախում: 5-օրյա ճամփորդության ընթացքում արտասահմանցի հյուրերը եղան Շուշիում, Տիգրանակերտում, Գանձասարում և մի շարք այլ վայրերում, մասնակցել են միջոցառումների ու հանդիպել արցախցի ընթերցողների հետ: Հայաստանից և Արցախից ստացած տպավորությունները հայտնի գրողները կներկայացնեն իրենց ստեղծագործություններում, որոնք մյուս տարվա ընթացքում կհրատարակվեն ամենամյա ժողովածուի կազմում:
Հիշեցնենք, որ «Գրական տապան» փառատոնն այս տարի անցկացվում էր արդեն 5-րդ անգամ: Միջազգային փառատոնն իրականացնում է Արտասահմանյան երկրների հետ մշակութային համագործակցության հայկական ընկերությունը (ԱՕԿՍ)՝ ՀՀ մշակույթի նախարարության աջակցությամբ: