Թուրքական դատարանը մերժել է հայտնի թուրք մտավորական Բասքըն Օրանի հայցն ընդդեմ նախագահ Ռեջեփ Թայիփ Էրդողանի:
Թուրքական դատարանը մերժել է թուրք մտավորական Բասքըն Օրանի հայցն ընդդեմ Էրդողանի
ՍՏԵՓԱՆԱԿԵՐՏ, դեկտեմբերի 14, ԱՐՑԱԽՊՐԵՍ: Դատական նիստին ներկա են եղել Օրանն իր փաստաբանի հետ և Էրդողանի կողմից լիազորված անձի վարձած փաստաբանը, փոխանցում է ԹԵՐԹ.ամ-ը:
Նշենք, որ Բասքըն Օրանը Թուրքիայում ապրող 1128 մտավորականներից մեկն է, որոնք ստորագրել են «Համալսարանականների նախաձեռնություն հանուն խաղաղության» նամակը, որով կոչ են արել իշխանություններին դադարեցնել երկրի արևելքում քրդերի զանգվածային կոտորածները: Նամակը վերնագրված է եղել «Մենք մեզ չենք նույնացնի այս ոճրի հետ»:
Էրդողանը քրդերի դեմ ռազմական գործողությունները դատապարտող այս մտավորականներին բազմիցս որակել է «ստոր», «դավաճան», «ավազակներ», ինչի առիթով Բասքըն Օրանը բողոքի հայցով դիմել էր դատարան:
Մինչդեռ դատարանը վճռել է, որ Էրդողանի օգտագործած խոսքերը չեն անցնում խոսքի ազատության սահմանը:
Էրդողանի փաստաբանը նախագահի այս քայլը ներկայացրել էր որպես պատասխան ահաբեկչության սատարմանն ու հավելել, որ Էրդողանի հնչեցրած կարծիքը վայելում է ժողովրդի մեծ մասի աջակցությունը: