Ադրբեջանի հետ զինված հակամարտության վերսկսումը հնարավոր է:
Վիգեն Սարգսյան. Պատերազմի վերսկսումը լրջագույն սպառնալիք կլինի ամբողջ Հարավային Կովկասի համար
ՍՏԵՓԱՆԱԿԵՐՏ, դեկտեմբերի 21, ԱՐՑԱԽՊՐԵՍ: Lenta.ru-ին տված հարցազրույցում այս մասին հայտարարել է Հայաստանի պաշտպանության նախարար Վիգեն Սարգսյանը:
«1994 թվականին եռակողմ ձեւաչափով՝ Ադրբեջան, Լեռնային Ղարաբաղ եւ Հայաստան, հրադադարի մասին համաձայնագիր ստորագրվեց: Ցավոք՝ 1994 թվականից ի վեր Բաքուն տորպեդահարում է խաղաղ գործընթացը: Ավելին, հետեւողականորեն խափանվում են հակամարտության լուծման հնարավոր ուղիներ գտնելու՝ միջազգային հանրության բոլոր փորձերը, ի դեմս ԵԱՀԿ Մինսկի խմբի համանախագահների (Ռուսաստան, ԱՄՆ, Ֆրանսիա): Այս տարվա ապրիլին Ադրբեջանը լայնածավալ հարձակում ձեռնարկեց Լեռնային Ղարաբաղի դեմ եւ պարտություն կրեց: Մենք մեր աշխատանքը կառուցում ենք ռազմական գործողությունների վերսկսման հնարավորության կանխավարկածի վրա:
Միաժամանակ, միանգամայն ակնհայտ է, որ Հայաստանի եւ տարածաշրջանի երկրների համար շահեկան չէ հակամարտության հնարավոր սրումը: Լինելով Լեռնային Ղարաբաղի Հանրապետության անվտանգության երաշխավորը՝ Երեւանը ստիպված կլինի ներգրավվել հակամարտությունում, եթե դա տեղի ունենա: Հասկանալի է նաեւ, որ պատերազմի վերսկսումը լրջագույն սպառնալիք կլինի ամբողջ Հարավային Կովկասի համար»,- հայտարարել է նախարարը: