Այսօր Քաշաթաղի շրջկենտրոն Բերձորի Սուրբ Համբարձման եկեղեցում շրջանի հոգևոր հովիվ Աթանաս վարդապետը Սուրբ ծննդյան պատարագ է մատուցել:
Բերձորում մատուցվել է Սուրբ ծննդյան պատարագ
ՍՏԵՓԱՆԱԿԵՐՏ, հունվարի 6, ԱՐՑԱԽՊՐԵՍ: Քաշաթաղի շրջանի «Մերան» պաշտոնաթերթի խմբագիր Զոհրաբ Ըռքոյանի փոխանցմամբ՝ պատարագն սկսվել է հոգևոր հոր օրհնությամբ և տերունական աղոթքով:
Եկեղեցու երգչախմբի ձայնակցությամբ հոգևորականները շարականներ ու աղոթքներ են հնչեցրել: Հայր Աթանասը խոսել է Քրիստոսի հրաշափառ ծննդի և մկրտության խորհրդի մասին՝ ասելով. «Հիսուսն իր ծննդով Աստծո լույսն է բերել ողջ մարդկությանը: Երկիր գալով Փրկիչը մաքրել է աշխարհը հեթանոսությունից»:
Հոգևոր հայրը խոսելով մեր ժողովրդի՝ որպես առաջինը պետականորեն քրիստոնեություն ընդունողի մասին՝ կոչ է արել չար մտքերից և արարքներից մաքրվել ու լինել միասնական: Հոգևոր հովիվն անդրադարձել է նաև Ջրօրհնեքի խորհրդին՝ ասելով, որ այն կապված է Քրիստոսի մկրտության հետ, և ջուրը մաքրության խորհրդանիշ է:
Ավարտելով Սուրբ Պատարագը՝ Հայր Աթանասը միմյանց նկատմամբ բարի ու սիրալիր լինելու ցանկությամբ դիմել է ներկաներին՝ մաղթելով, որ 2017-ը լինի խաղաղության ու հաջողությունների տարի, աղոթք է հղել առ Աստված, որ Տերը բարեհաճ լինի հայ ժողովրդի հանդեպ, ուժ, զորություն և առողջություն տա հայ զինվորին:
Սուրբ արարողությունից հետո եկեղեցում օրհնված ջուրը ներկաները իրենց տներ են տարել, որը համարվում է բուժիչ և մարդկանց մաքրում է մեղքերից, չար խորհուդներից:
Պատարագին ներկա էին բերձորցիներ, մոտակա համայնքների բնակիչներ, հյուրեր, շրջվարչակազմի և քաղաքապետարանի աշխատակիցներ:
Նշենք, որ հունվարի 5-ի երեկոյան Քաշաթաղի շրջկենտրոն Բերձորի Սուրբ Համբարձման եկեղեցում շրջանի հոգևոր հովիվ Հայր Աթանաս վարդապետը նաև Սուրբծննդյան Ճրագալույցի Սուրբ պատարագ էր մատուցել: