Հայաստանի բադմինթոնի հավաքականի անդամ, Հայաստանի 8-ակի չեմպիոնուհի Լիլիթ Պողոսյանը տարին սկսել է մարտական տրամադրվածությամբ:
Լիլիթ Պողոսյան. «Սկսում եմ «Տոկիո 2020»-ի համար վարկանշային միավորներ հավաքել»
ՍՏԵՓԱՆԱԿԵՐՏ, հունվարի 18, ԱՐՑԱԽՊՐԵՍ: Ակնկալիքները մեծ են, նպատակները` շատ, իսկ գլխավորը` 2020 թ. Տոկիոյում կայանալիք Օլիմպիական խաղերի ուղեգիր նվաճելն է, որին հասնելու համար աշխատանքներն սկսվում են արդեն հիմա:
Panorama.am-ի հետ զրույցում Լիլիթը խոսեց նախորդ տարվա ձեռքբերումների ու ձախողումների, ինչպես նաև առաջիկա մրցաշարերի մասին, հենց որոնցից էլ կսկսի մրցաշրջան 2017-ը: Ցավոք, 2016-ի սկզբին հայ մարզուհուն վնասվածքը թույլ չտվեց մասնակցել միջազգային մրցաշարերի ու լավ մարզավիճակ ձեռք բերել, իսկ առջևում Եվրոպայի առաջնությունն էր:
«Բարեբախտաբար, դեռևս 2015 թ. հոկտեմբերին Բուլղարիայի միջազգային մրցաշարում ունեցած երկու հաղթանակներս բավական շատ վարկանշային միավորներ էին բերել, հենց որոնց շնորհիվ էլ ընդգրկվեցի այն 46 լավագույնների շարքում, ովքեր պետք է մասնակցեին Եվրոպայի առաջնությանը։ Սա, ի դեպ, Հայաստանի բադմինթոնի պատմության մեջ ևս ամրագրվեց. վերջին անգամ 14 տարի առաջ՝ 2002 թ. էինք ունեցել Եվրոպայի առաջնության մասնակիցներ։
Գլխավոր ստուգատեսն անցկացվեց Ֆրանսիայի Լա Ղոշ Սյուղ Յոն քաղաքում: Ցավոք, այնքան էլ հաջող հանդես չեկա: 2-1 հաշիվ գրանցվեց։ Առաջին սեթը հաղթեցի, մյուս 2-ը պարտվեցի։ Հետո օգոստոսին մասնակցեցի Բուլղարիայի միջազգային մրցաշարին` 2 հաղթանակ որակավորման փուլում։ 2016 թ. ամենամեծ ձեռքբերումս կարող եմ համարել այն, որ ընդգրկվեցի բադմինթոնի Եվրոպայի կոնֆեդերացիայի նոր ծրագրի՝ «Centre of Excellence» -ի թեկնածուների շարքում»,- պատմեց Լիլիթը:
«Centre of Excellence»-ն այն մարզիկների համար է, ովքեր իրենց երկրում անհրաժեշտ պայմաններ ու մրցակիցներ չունեն` առաջ գնալու համար։ Հայ մարզուհու խոսքերով`դա հենց այն էր, ինչի մասին վաղուց երազել է։
«Երեք նախընտրական ուսումնամարզական հավաք են կազմակերպելու վերջնական անդամներին որոշելու համար։ Առաջինն անցկացվեց Դանիայի Վեյեն քաղաքում` դեկտեմբերին։ Մյուս երկուսն արդեն կկազմակերպվեն այս տարի։ Մի քանի օրից կհայտարարեն քաղաքը ու խաղացողներին էլ կտեղեկացնեն՝ արդյո՞ք հրավիրվելու են, թե ոչ: Եթե ընտրվեմ, պիտի տեղափոխվեմ Եվրոպա ու մարզումներս շարունակեմ մարզաձևի եվրոպացի լավագույն ներկայացուցիչների հետ»,- պարզաբանեց հայ մարզուհին:
2017 թ. առաջին կանգառը Լիլիթ Պողոսյանի համար կլինի Իրանի միջազգային մրցաշարը, որից հետո կմասնակցի Ավստրալիայի Բաց առաջնությանը: Լիլիթը հուսով է, որ հենց այս մրցաշարերում կկարողանա անհրաժեշտ վարկանշային միավորներ ձեռք բերել` Եվրոպայի առաջնության ուղեգիր նվաճելու համար։
«Առաջիկա չորս ամիսների գլխավոր նպատակս Եվրոպայի առաջնության ուղեգիր նվաճելն է: Անհրաժեշտ վարկանիշ ձեռք բերելու առաջին կանգառը Թեհրանում անցկացվելիք «Iran Fajr International Challenge» մրցաշարն է, որը կանցկացվի փետրվարի 9-12-ը: Իրանի մրցաշարի մրցակցիս անունը պարզ կդառնա հունվարի 24-ին: Այս տարի շատ մարտական եմ տրամադրված, որովհետև արդեն սկսում եմ «Տոկիո 2020»-ի համար վարկանշային միավորներ հավաքել»,- ասաց Լիլիթ Պողոսյանը։
Հայ մարզուհին նպատակին հասնելու համար պատրաստ է քրտնաջան աշխատել, նվիրվել ու չհանձնվել, իսկ որակական նման հատկանիշներով առաջնորդվող մարզիկներին հաջողությունը երկար սպասեցնել չի տա:
