Ալեքսանդր Լապշինի նկատմամբ Բելառուսի իշխանությունների գործողությունները վրդովեցուցիչ են:
Ստեփանակերտ. Ալեքսանդր Լապշինի նկատմամբ Բելառուսի իշխանությունների գործողությունները վրդովեցուցիչ են
ՍՏԵՓԱՆԱԿԵՐՏ,հունվարի 20, ԱՐՑԱԽՊՐԵՍ: Այս մասին հայտարարեց Լեռնային Ղարաբաղի Հանրապետության նախագահի մամուլի քարտուղար Դավիթ Բաբայանը՝ NEWS.am-ի խնդրանքով մեկնաբանելով հաղորդումն այն մասին, որ Բելառուսի իշխանությունները որոշել են բավարարել բլոգեր Ալեքսանդր Լապշինին արտահանձնելու Ադրբեջանի հարցումը:
«Ակնբախ է միջազգային իրավունքի կոպտագույն խախտումը: Եվ ցավալիորեն ստիպված ենք արձանագրել, որ նացիստներից դաժանորեն տուժած երկիրը գործում է նացիստների օրինակով՝ տառացիորեն վաճառելով անմեղ մարդուն»,- հայտարարեց Դավիթ Բաբայանը: Նա հիշեցրեց, որ Ադրբեջանի իշխանությունները առաջին անգամ չեն խոշոր ներդրումների միջոցով հրապարակավ միջազգային իրավունքը խախտում: «Ռամիլ Սաֆարովի արտահանձնման դեպքում մենք նույն բանը տեսանք, միայն թե հակառակը՝ բոլոր հնարավոր օրենքների խախտմամբ հանցագործը հանձնվեց հայրենիքին, ազատվեց եւ հերոս հռչակվեց»,- նշեց Բաբայանը:
Նրա խոսքով՝ եթե Բելառուսի իշխանությունները, այնուամենայնիվ, մինչեւ վերջ գնան, եւ Ալեքսանդր Լապշինը հայտնվի Ադրբեջանում, դա իր՝ Բելառուսի ղեկավարության համար վատագույն հեռանկարներ կնշանակի: «Իշխանությունը, որն այսպիսի արժեքներով է առաջնորդվում, վաղ թե ուշ կտապալվի: Յուրաքանչյուրն արժանվույնը կստանա: Ցավոք, հիմա Բելառուսի իշխանությունները ցույց են տալիս, որ նավթադոլարները, խավիարը եւ առաջնորդների պատկերներով մեդալները նրանց համար ազատությունից եւ իրավունքից ավելի թանկ են: Սա Օսվենցիմի յուրատեսակ շարունակություն է բառի լայն իմաստով»,- նշեց Դավիթ Բաբայանը:
Դեկտեմբերի կեսին Լապշինը, որը նաեւ ՌԴ քաղաքացի է, Մինսկում ձերբակալվել էր Ադրբեջանի հարցումով, որտեղ նրան ԼՂՀ այցելության համար ընդգրկել էին «սեւ ցուցակում»։ Լապշինը, սակայն, 2015-ին Վրաստանի տարածքով եւ Ուկրաինայի քաղաքացու անձնագրով մտել էր Ադրբեջան այն բանի շնորհիվ, որ նրա անվան գրության մեջ տառի տարբերություն կա։ Ուկրաինական անձնագրում գրված է «Օլեկսանդր»։ Դրանից հետո Ադրբեջանը բլոգերի նկատմամբ միջազգային հետախուզում էր սկսել «Պետական սահմանի մասին» օրենքի խախտման հոդվածով։