Մոսկվայի Չայկովսկու անվան պետական կոնսերվատորիան որպես նվեր ստացել է աշխարհահռչակ կոմպոզիտոր Արամ Խաչատրյանի կիսանդրիի քանդակը:
Մոսկվայի կոնսերվատորիայում բացվել է Արամ Խաչատրյանի կիսանդրին
ՍՏԵՓԱՆԱԿԵՐՏ, փետրվարի 2, ԱՐՑԱԽՊՐԵՍ: Ինչպես հաղորդում է ՏԱՍՍ-ը, կոմպոզիտորի կիսանդրին կտեղադրվի կոնսերվատորիայի Մեծ դահլիճի նախասրահում:
Քանդակի հեղինակը Հայաստանի վաստակավոր նկարիչ, Մոսկվայի նկարիչների միության անդամ, քանդակագործ Միքայել Սողոյանն է: Նվիրատվությունն արել է Արմեն Սադգյանը:
«Մեր նշանավոր կոմպոզիտորները, դիրիժորները, կատարողները մարմնավորում են արդեն տարբեր երկրների համատեղ պատմությունը, սակայն, այնուամենայնիվ, մնում են այնպիսի համագործակցության օրինակ, որը մեզ պետք է միավորի հիմա` ներկայում և ապագայում»,- կիսանդրիի բացման արարողության ժամանակ նշել է Ռուսաստանի մշակույթի փոխնախարար Ալեքսանդր Ժուրավսկին: Նրա խոսքով` հայ և ռուս ժողովուրդների խորհրդանշական միասնության մասին է վկայում նաև այն փաստը, որ Խաչատրյանի ևս մեկ կիսանդրի բացվելու է նաև Երևանում:
Քանդակագործ Միքայել Սողոյանի խոսքով` կիսանդրիի ստեղծման գաղափարի ոգեշնչողը դաշնակահար Դենիս Մացուևն էր, ով ևս ներկա է գտնվել բացման արարողությանը: «Այնպես համընկավ, որ Թաթարստանի պետական սիմֆոնիկ նվագախմբի գլխավոր դիրիժոր Ալեքսանդր Սլադկովսկու հետ այսօր համերգ ունենք, որի ընթացքում հարգանքի տուրք կմատուցենք մեծ կոմպոզիտոր Արամ Խաչատրյանին»,- նշել է Մացուևը:
Արամ Խաչատրյանը (1903-1978թ.թ.) ԽՍՀՄ ժողովրդական արտիստ էր, 20-րդ դարի մեծագույն կոմպոզիտորներից մեկը: Հեղինակել է 3 բալետ, 3 սիմֆոնիա, 6 կոնցերտ, բազմաթիվ վոկալ, խմբային, գործիքային և այլ երաժշտական ստեղծագործություններ: Նա հեղինակել է նաև Խորհրդային Հայաստանի հիմնի երաժշտությունը:
Արժանացել է մի շարք պարգևների, մասնավորապես, Սոցիալիստական աշխատանքի հերոսի, Լենինյան մրցանակի, Ստալինյան մրցանակի քառակի դափնեկիր է: Արամ Խաչատրյանը նաև Մոսկվայի պետական կոնսերվատորիայի պրոֆեսոր էր: