Երեկ՝ մարտի 1-ին, մաեստրո Գևորգ Մուրադյանի ծննդյան 70-ամյակն էր:
Մաեստրո Գևորգ Մուրադյանին շնորհվել է Արցախի Հանրապետության ժողովրդական արտիստի կոչում
ՍՏԵՓԱՆԱԿԵՐՏ, մարտի 2, ԱՐՑԱԽՊՐԵՍ։ «Արցախպրես»-ի հաղորդմամբ՝ հոբելյանի կապացությամբ Ստեփանակերտի մշակույթի և երիտասարդության պալատում տեղի է ունեցել Արցախի կամերային նվագախմբի համերգը, որը նվիրված էր նվագախմբի հիմնադիր և գլխավոր դիրիժոր Գևորգ Մուրադյանի 70-ամյակին:
Երեկոյի ընթացքում շնորհավորելով արվեստագետին՝ ԱՀ մշակույթի և երիտասարդության հարցերի նախարար Նարինե Աղաբալյանը հայտարարել է, որ Արցախում երաժշտարվեստի զարգացման գործում ունեցած մեծ ավանդի համար և ծննդյան 70 ամյակի կապակցությամբ, Գևորգ Մուրադյանին, Արցախի Հանրապետության նախագահ Բակո Սահակյանի հրամանագրի համաձայն, շնորհվել է ԱՀ ժողովրդական արտիստի կոչում:
«Ես համարում եմ, որ ոչինչ պատահական չի լինում, և մաեստրոն պատահական չի հայտնվել Արցախում: Դժվար չէ հիշել 2004 թ.-ը, երբ մաեստրոն, գալով Արցախ, իր հետ բերեց երաժշտության կենարար շունչը և ներարկեց Արցախում ապրող մարդկանց: Այսօր արդեն Արցախի պետական կամերային նվագախումբը մեր կարևորագույն խորհրդանիշներից է, որը ներկայացնում է ոչ միայն դասական երաժշտարվեստը, այլև Արցախը՝ ողջ աշխարհին»,- ասել է Ն. Աղաբալյանը և նշել, որ եթե 2004 թվականին հնարավոր եղավ ստեղծել կամերային նվագախումբ, ապա այսօր արդեն սիմֆոնիկի ստեղծման ժամանակն է:
Գևորգ Մուրադյանը իր ելույթում երախտագիտություն է հայտնել իրեն շնորհած բարձր կոչումի համար և նշել, որ երբեք կոչումների հետևից չի ընկել, և սա նրա անձնվեր, անբասիր աշխատանքի արդյունքն է:
«Ես ուղղակի իմ գործն եմ կատարել, և դա տեսել ու գնահատել են պետական այրերն ու ժողովուրդը: Այնպես որ ես չեմ ամաչում այս կրծքանշանը կրելուց, ես վաստակել եմ այդ իրավունքը: Երջանիկ եմ, որ Աստծո կամոք այստեղ եմ գտնվում, սա իմ հարազատ հողն ու ջուրն է: Այստեղ արյուն են թափել մեր ազատամարտիկները՝ հանուն այսօրվա, մենք էլ ենք ազատամարտիկ, մենք էլ մեր արվեստով ենք պայքարում՝ ակտիվ մասնակցելով պետականաշինության գործին»,- հավելել է արվեստագետը:
Մաեստրոյի ծննդյան 70 ամյակին նվիրված համերգին ներկա էր նաև ԱՀ ԱԺ նախագահ Աշոտ Ղուլյանը, ով նույնպես շնորհավորել է Գևորգ Մուրադյանին:
«Ես ուրախ եմ, որ հենց սկզբից ինձ բախտ է վիճակվել ձեր անցած ճանապարհի որոշ հանգրվաններում լինել ձեզ հետ: Կամերային նվագախումբ ստեղծելը ոչ միայն շատ ճիշտ որոշում էր, այլև շատ կարևոր էր, որ այդ ճանապարհի գլխավոր դերակատար է ընտրվել հենց Գևորգ Մուրադյանը: Վստահ եմ՝ հետագայում Դուք ավելի մեծ բեմեր եք նվաճելու»,- մասնավորապես ասել է Ա. Ղուլյանը:
Գևորգ Մուրադյանի 70 ամյակին նվիրված համերգին ներկա էին ԱՀ առաջին տիկին Անահիտ Սահակյանը, պետական այրեր, արվեստագետի ընկերներ, ՀՀ-ից հյուրեր, մաեստրոյի արվեստի սիրահարներ:
