Ադրբեջանի իշխանություննների կողմից պարբերաբար հնչող ատելության կոչերն ու պատերազմական հռետորաբանությունը հանգեցնում են մարդու իրավունքների զանգվածային եւ բիրտ խախտումների, ինչպես դա տեղի ունեցավ 2016 թվականի ապրիլին Ադրբեջանի լայնածավալ ռազմական ագրեսիայի հետեւանքով:
Բաքվի պատերազմական հռետորաբանությունը հանգեցնում է մարդու իրավունքների զանգվածային խախտումների. Աշոտ Հովակիմյան
ՍՏԵՓԱՆԱԿԵՐՏ, մարտի 2, ԱՐՑԱԽՊՐԵՍ։ Փետրվարի 27-28-ը Ժնեւում անցկացված ՄԱԿ-ի Մարդու իրավունքների խորհրդի 34-րդ նստաշրջանի ընթացքում ունեցած ելույթում այս մասին հայտարարել է Հայաստանի ԱԳ փոխնախարար Աշոտ Հովակիմյանը:
Նա ընդգծել է նաեւ Ադրբեջանի կողմից Արցախ այցելած լրագրողներին եւ խորհրդարանականներին քրեական հետապնդման ենթարկելու երեւույթի դեմ պայքարելու կարեւորությունը։
Իր ելույթում Աշոտ Հովակիմյանն անդրադարձել է նաեւ ՄԱԿ-ի շրջանակում Ցեղասպանության կանխարգելման ուղղությամբ Հայաստանի կողմից ձեռնարկվող քայլերին՝ հիշատակելով 2015 թվականին Հայաստանի նախաձեռնած եւ Մարդու իրավունքների խորհրդում ընդունված Ցեղասպանության կանխարգելման վերաբերյալ բանաձեւը, ինչպես նաեւ դեկտեմբերի 9-ը «Ցեղասպանության հանցագործության զոհերի հիշատակի եւ արժանապատվության ու այդ հանցագործության կանխարգելման միջազգային օր» հռչակելու վերաբերյալ ՄԱԿ-ի Գլխավոր վեհաժողովի բանաձեւը:
Աշոտ Հովակիմյանը խոսել է նաեւ Սիրիայի ճգնաժամի եւ դրա հետևանքով Հայաստանում ապաստանած շուրջ 20.000 սիրիահայ փախստականների մասին՝ վերահաստատելով պատերազմից տուժած եւ տեղահանման վտանգի տակ գտնվող Սիրիայի բնակչությանը մարդասիրական աջակցություն ցուցաբերելու՝ Հայաստանի պատրաստակամությունը:
Նստաշրջանին մասնակցել եւ ելույթ են ունեցել նաեւ ՄԱԿ-ի գլխավոր քարտուղար Անտոնիո Գուտերեշը, Մարդու իրավունքների հարցերով ՄԱԿ-ի գերագույն հանձնակատար Զեիդ Ռաադ ալ-Հուսեյնը, ՄԱԿ-ի գլխավոր վեհաժողովի նախագահ Պիտեր Թոմսոնը, բազմաթիվ երկրների արտաքին գործերի նախարարներ եւ փոխնախարարներ, միջազգային կառույցների ղեկավարներ: