Հայաստանի արտաքին գործերի նախարար Էդվարդ Նալբանդյանը եւ Սիրիայի փոխվարչապետ, արտաքին գործերի եւ սփյուռքի նախարար Ուալիդ ալ-Մուալլիմը այսօր՝ մարտի 6-ին, ուղերձներ են փոխանակել՝ Հայաստանի Հանրապետության եւ Սիրիայի Արաբական Հանրապետության միջեւ դիվանագիտական հարաբերությունների հաստատման 25-ամյակի կապակցությամբ:
Մենք գնահատում ենք ՀՀ դիրքորոշումը՝ Սիրիայի դեմ ահաբեկչական ագրեսիայի նկատմամբ. Սիրիայի ԱԳ նախարար
ՍՏԵՓԱՆԱԿԵՐՏ, մարտի 6, ԱՐՑԱԽՊՐԵՍ: ԱԳՆ-ից հայտնում են, որ Էդվարդ Նալբանդյանն իր ուղերձում նշում է, որ երկու հնագույն ժողովուրդների` հայերի ու սիրիացիների միջեւ բարեկամական հարաբերություններն անցել են ժամանակի փորձությունը եւ խարսխվում են փոխադարձ հարգանքի ու վստահության կուռ հիմքերի վրա: Հայաստանի արտգործնախարարը շեշտում է, որ հայ ժողովուրդը չի մոռանա այն մեծ մարդասիրական հոգածությունը, որը Սիրիայի ժողովուրդը դրսեւորել է՝ ապաստան տալով Ցեղասպանությունից փրկված իր զավակներին:
Էդվարդ Նալբանդյանն իր ուղերձում ընդգծում է, որ Հայաստանը սիրիական ճգնաժամի ամենասկզբից միջազգային տարբեր հարթակներում մշտապես բարձրաձայնում է Սիրիայում խաղաղության եւ անվտանգության հաստատման կարեւորությունը, դատապարտում է ահաբեկչությունը, հնարավորության սահմաններում մարդասիրական օժանդակություն տրամադրում Սիրիայի ժողովրդին:
Նախարար Նալբանդյանն, այս նշանակալի հոբելյանի առիթով ի մի բերելով հայ-սիրիական համագործակցության հաջողությունները, համոզմունք է հայտնում, որ համատեղ ուժերով կհաջողվի առավել ընդլայնել եւ խորացնել փոխգործակցությունը՝ հանուն երկու բարեկամ ժողովուրդների բարօրության։
Ուալիդ ալ-Մուալլիմն իր ուղերձում նշում է, որ Հայաստանի եւ Սիրիայի միջեւ դիվանագիտական հարաբերությունների հաստատումը մարմնավորում է սիրիացի եւ հայ ժողովուրդների պատմական կապերը եւ արտահայտում քաղաքական, տնտեսական, սոցիալական եւ մշակութային ոլորտներում հարաբերությունները զարգացնելու կամքը:
Նախարար Մուալլիմն ընդգծում է, որ Սիրիան՝ իր քաղաքական ղեկավարությամբ, կառավարությամբ եւ ժողովրդով, ամենայն գնահատանքով է դիտում բարեկամ Հայաստանի նպաստավոր դիրքորոշումները՝ Սիրիայի դեմ ահաբեկչական ագրեսիայի նկատմամբ: Սիրիայի արտգործնախարարը նշում է, որ Սիրիայի ժողովրդի դեմ ագրեսիան կատարող կողմերից մեկը հայ ժողովրդի նկատմամբ ցեղասպանություն իրականացնող նույն կողմն է, որի քաղաքականությունը խարսխված է միահեծան իշխանության եւ սուլթանական սին երազանքների վրա, ինչը դատապարտված է ձախողման եւ ամենավատ հետեւանքներ կունենա ագրեսորի համար:
Ուալիդ ալ-Մուալլիմը հավելում է, որ Սիրիան, որը սկսել է հաղթանակներ արձանագրել ահաբեկիչների դեմ, վստահ է, որ այն բարեկամները, ովքեր նրա կողքին կանգնեցին ագրեսիայի ժամանակ, նրան ձեռք կմեկնեն ահաբեկչության ավերածությունները վերականգնելու համար: Սա բացառիկ առիթ է հանդիսանում, որ բոլոր ոլորտներում զարգացնենք մեր երկու երկրների միջեւ համագործակցությունը:
Էդվարդ Նալբանդյանը, շնորհավորելով իր սիրիացի գործընկերոջը՝ դիվանագիտական հարաբերությունների հաստատման 25-ամյակի կապակցությամբ, Սիրիայի բարեկամ ժողովրդին մաղթում է շուտափույթ խաղաղություն եւ բարեկեցություն:
Ուալիդ ալ-Մուալլիմը, շնորհավորելով Էդվարդ Նալբանդյանին երկու պետությունների միջեւ դիվանագիտական հարաբերությունների հաստատման 25-ամյակի կապակցությամբ, բարեկամ Հայաստանին մաղթում է զարգացում եւ բարգավաճում: