Արցախի Քաշաթաղի շրջանի հարավային թևում սկսվել են գարնանացանի նախապատրաստական աշխատանքները:
Քաշաթաղի շրջանի հարավում սկսել է գարնանացանի նախապատրաստումը
ՍՏԵՓԱՆԱԿԵՐՏ, մարտի 12, ԱՐՑԱԽՊՐԵՍ: Իշխանաձորը դարձել է տարածքի կենտրոնը, որտեղ գործում է 2 մեքենա-տրակտորային կայաններ, «Քաշաթաղի ջրամատակարարում» ՓԲԸ-ի ոռոգման ցանցի և ճանապարհաշինական բաժինը: Շրջվարչակազմի ղեկավար Սուրեն Խաչատրյանը տեղում է կազմակերպում գյուղատնտեսական, ճանապարհաշինական, ինչպես նաև՝ գյուղի նոր կառուցվող բնակելի թաղամասի շինարարական և այլ աշխատանքների գործընթացը: Տեղեկացրեց՝ բնակարանաշինարարական և ճանապարհների բարեկարգման աշխատանքների ֆինանսավորումն իրականացվում է ԱՀ կառավարության և «Քաշաթաղ» բարեգործական հիմնադրամի կողմից: Կարևորեց հատկապես բնակարանաշինությունը և գյուղատնտեսական աշխատանքների ընթացքը տարածքի կայացման գործում: Այստեղ բնակվող ու բարիք ստեղծողները հանդիսանում են նաև բանակի թիկունք, իսկ հարկ եղած դեպքում առաջինն են օգնության հասնաում դիրքերը պահող զինվորին:
Շրջվարչակազմի աշխատակազմի գյուղվարչության պետ Լևոն Սիմոնյանի ուղեկցությամբ Երիցվանք և Փակահան գյուղերում ծանոթացա ջերմոցային տնտեսություններում կատարվող աշխատանքներին: Երիցվանքի գյուղական համայնքի ղեկավար Զարզանդ Միքայելյանի տեղեկատվությամբ՝ գյուղում մոտ 15 ընտանիք է զբաղվում ջերմոցային տնտեսությամբ (մոտ 5000ք/մ), որոնցում այս օրերին հիմնականում իրականացվում է բանջարաբոստանային մշակաբույսերի՝ լոլիկի, պղպեղի, սմբուկի և այլ բույսերի սերմերի ցանքս՝ սածիլներ ստանալու նպատակով: Նշեց նաև, որ համայնքում յուրաքանչյուր տարի մշակվում է մոտ 25հա բանջարեղեն, 20հա ձմերուկ, 800հա հացահատիկ՝ գարի և ցորեն:
Հայկ Մուրադյանն ընտանիքով Երիցվանք է եկել 1998-ին: Մեր այցի պահին ջերմոցում հողին հանձնած լոլիկի և պղպեղի սերմերն էր ջրում:
-Մոտ 15 օր ուշացումով ենք այս տարի սկսել աշխատանքները,- ասաց Հայկը՝ հավելելով, որ մոտ 1 հա բանջարանոցի համար են սածիլները: Հրաչ Վարդանյանը 3հա լոլիկի և պղպեղի ցանքսի համար է սածիլ ստանալու: Տարիների փորձով է աշխատում՝ համայնքում արտադրված բանջարեղենը հիմնականում հատկացնելով Ստեփանակերտի «Արցախ ֆրուտ» գործարանին:
Փակահանի գյուղական համայնքի ղեկավար Արայիկ Եղիազարյանը հոր ու եղբոր հետ ավելի շատ տարածք են նախապատրաստել բանջարաբոստանային մշակաբույսեր արտադրելու համար: Ջերմոցում սածիլներն արդեն ծիլ էին տվել: Ասաց՝ գյուղում մոտ 10 ընտանիք նույնպես ջերմոցային տնտեսություն ունի: Գյուղվարչության պետի տվյալներով՝ տարածքում մոտ 55 ջերմոցային տնտեսություն կա: Գյուղվարչության պետի հետ բարձրացանք նաև Թովմասարի սարահարթ, որտեղ գրեթե 8000հա հացահատիկի (ցորեն և գարի) աշնանացան է կատարվել:
-100հա տարածք այժմ սև ցելի տակ է. –ասաց Լ. Սիմոնյանը; 10 անգամ ավելի տարածք էլ թողել ենք կանաչ ցելի համար, այսինքն հերկելու ենք այն ժամանակ, երբ կանաչ խոտը 10-15 սմ կբարձրանա: Բացատրեց, որ խոտի կանաչ զանգվածը հարուստ է ազոտով, որն էլ կմնա հողի մեջ՝ պարարտացնելով այն:
Անցած ձմռանն այստեղ ևս աննախադեպ ցրտահարություն եղավ, որի պտաճառով աշնանացանի որոշ հատվածներում հատկապես գարու ծիլերը (մոտ՝ 20-25 տոկոսը) ցրտահարվել են: Գրեթե 100հա տարածք էլ վարակված է գնայուկ բզեզով: Լ. Սիմոնյանը կարևորեց պայքարն այդ վնասատուների դեմ՝ ասելով, որ յուրաքանչյուր հեկտարի համար անհրաժեշտ է մոտ 15.000 դրամ, այլապես վարակված տարածքները կմեծանան. Անցած աշնանը և այս գարնանը աշխատանքներ են տարվել մկնանման կրծողների դեմ պայքարում, որը տվել է լավ արդյունք: Շրջանում անցած աշնան ընթացքում կատարվել է 17.171հա հացահատիկի՝ ցորենի ու գարու աշնանցան; Լ. Սիմոնյանը տեղեկացրեց՝ նախատեսված է նաև 3000-3500հա գարնանացան կատարել: Դրա մեջ է մտնում նաև բանջարաբոստանային մշակաբույսերի, բոստան-պարենի, եգիպտացորենի և այլ բույսերի ցանքսը: Պլանավորված է շրջանում ընդհանուր ցանքսը 21 հազար հեկտարը գերազանցել:
Բանջարաբոստանային մշակաբույսերի՝ ավելի շատ արտադրելու նպատակով ԱՀ կառավարությունը կես և ավելի հեկտար նման բույսեր մշակողներին անհատույց հատկացնում է ֆինանսական աջակցություն՝ 1հա-ի համար 200.000 դրամ: Որոշ բույսերի արտադրության համար անհատույց հատկացվում է սերմացու, իսկ յուղատու բույսեր (արևածաղիկ, հլածուկ, սոյա, կտավատ) արտադրողներին, բացի սերմացուից, կտրվի ֆոսֆորական և կալիումական պարարտանյութ: Այս տարի համայնքներից ավելի շատ հայտ է ներկայացվել առվույտի սերմացուի համար: Այս օրերին արվում է հնարավորը՝ բարձր բերքատվություն ապահովելու նպատակով: Ժամանակն է նաև՝ իրականացնել հակահրդեհային աշխատանքներ:
Զոհրաբ Ըռքոյան»։