Ֆրանկոֆոնիայի միջազգային օրվան նվիրված միջոցառումների շրջանակներում այսօր՝ մարտի 17-ին, «Պոլ Էլյուարի տուն» ֆրանկոֆոնիայի կենտրոն հիմնադրամի նախաձեռնությամբ Ստեփանակերտի թիվ 2 դպրոցում տեղի է ունեցել ինտելեկտուալ խաղ-մրցույթ:
Արցախում մեկնարկել են Ֆրանկոֆոնիայի միջազգային օրվան նվիրված միջոցառումները
ՍՏԵՓԱՆԱԿԵՐՏ, մարտի 17, ԱՐՑԱԽՊՐԵՍ: «Արցախպրես»-ի թղթակցի հետ զրույցում «Պոլ Էլյուարի տուն ֆրանկոֆոնիայի կենտրոն» հիմնադրամի տնօրեն Նելլի Ավանեսյանը նշել է, որ ամեն տարի մարտի 20-ին ամբողջ աշխարհում նշվում է ֆրանսախոսության միջազգային օրը:
«Մեր կենտրոնը ևս այս օրերին մի շարք ծրագրեր է իրականացնելու: Առաջինն այսօրվա ինտելեկտուալ խաղն էր, որի միջոցով փորձել ենք ստուգել աշակերտների ֆրանսերեն լեզվի իմացությունը: Խաղ-մրցույթին մասնակցել են Ստեփանակերտի N 1, 2, 4, 6, 7 և 9 դպրոցների 7-9-րդ դասարանների աշակերտները: Առաջին տեղը զբաղեցրած թիմի անդամները ստացել են գրքեր, երկրորդ տեղը զբաղեցրածները՝ հուշանվեր ու բառարան, իսկ երրորդը՝ ֆրանսերենի մեկ գիրք»,- մանրամասնել է Ն. Ավանեսյանը:
Կենտրոնի տնօրենը նշել է նաև, որ Ֆրանկոֆոնիայի միջազգային օրվան նվիրված միջոցառումների շրջանակներում վաղը Ստեփանակերտի «Թումո» կենտրոնում տեղի կունենա ֆիլմերի և մուլտֆիլմերի ցուցադրություն, իսկ մարտի 21-ին Ստեփանակերտի մշակույթի և երիտասարդության պալատում տեղի կունենա միջոցառում՝ նվիրած ֆրանսիական մշակույթին: