Ստեփանակերտի մշակույթի և երիտասարդության պալատի նախաձեռնությամբ երեկ՝ մարտի 24-ին, կայացել է «Գրացիա» պարային փառատոնի ժողովրդական փուլը՝ նվիրված պարուսույց Ելենա Սարգսյանի հիշատակին:
Կայացել է «Գրացիա» պարային փառատոնի ժողովրդական փուլը
ՍՏԵՓԱՆԱԿԵՐՏ, մարտի 25, ԱՐՑԱԽՊՐԵՍ: Փառատոնին հանդես են եկել Հադրութի, Տողի, Մարտակերտի, Վանքի, Շուշիի և Ստեփանակերտի արվեստի դպրոցների, մանկապատանեկան, մշակույթի և երիտասարդության կենտրոնների սաները:
«Արցախպրես»-ի թղթակցի հաղորդմամբ «Գրացիա» պարային փառատոնի հանձնախմբի նախագահ, Ստեփանակերտի պարարվեստի քոլեջի դասական պարերի բաժնի վարիչ, վաստակավոր արտիստ Տատյանա Միրզոյանն իր ելույթում ասել է, որ փառատոնի նպատակն է՝ հանդիսատեսներին ապահովել տոնական լավ տրամադրություն:
«Մեզ դա հաջողվել է, և մենք այսօր, իրոք, անց ենք կացրել հիանալի միջոցառում. պարզապես կցանկանայի, որ հանրապետության շրջաններից էլ ավելի շատ մասնակիցներ ընդգրկվեին:»,- ասել է Տ. Միրզոյանը:
«Նմանատիպ միջոցառումների կազմակերպումը գնալով որակապես էլ ավելի զարգացում կապրի և կնպաստի Արցախում պարարվեստի զարգացմանը»,- նշել է փառատոնի հանձնախմբի անդամ, Ստեփանակերտի «Շուշի» ազգագրական երգ-պարի համույթի հիմնադիր-ղեկավար Գագիկ Հարությունյանը՝ հավելելով, որ հայ արվեստի ապագան ձևավորվում է հենց ազգագրական երգի ու պարի ասպարեզում:
Նշենք նաև, որ մարտի 31-ին կայանալու է «Գրացիա» պարային փառատոնի դասական և ժամանակակից փուլերը: Իսկ ապրիլի 6-ին տեղի է ունենալու փառատոնի գալահամերգը, որտեղ էլ որոշվելու են փառատոնի հաղթողները՝ լավագույն բեմադրություն, լավագույն կատարում և լավագույն հագուստ անվանակարգերում:
