ԱՀ մշակույթի և երիտասարդության հարցերի նախարարության նախաձեռնությամբ Ստեփանակերտում երեկ կայացել է ԱՀ արվեստի վաստակավոր գործիչ, ակորդեոնահար Վալերի Գասպարյանի 70-ամյակին նվիրված հանդիսավոր միջոցառում:
Ստեփանակերտում տեղի է ունեցել Վալերի Գասպարյանի 70-ամյակին նվիրված միջոցառում
ՍՏԵՓԱՆԱԿԵՐՏ, մարտի 28, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ ամենամեծ անակնկալը հոբելյարի համար եղել է՝ միջոցառմանը մասնակցելու համար Մոսկվայից ժամանած երաժիշտ որդին, ով իր դաշնամուրային նվագով շնորհավորել է հորը:
Շնորհավորանքներով հանդես են եկել նաև Վ. Գասպարյանի երաժիշտ գործընկերները: Հոբելյարի հասցեին հնչել են նաև շնորհավորական խոսքեր:
ԱՀ մշակույթի և երիտասարդության հարցերի նախարար Նարինե Աղաբալյանը շնորհավորել է հոբելյարին ու կարևորել նրա վաստակը Արցախի արվեստի զարգացման գործում:
«Վ. Գասպարյանը մեր այն երաժիշտն է, ով կարողանում է իր բարձր արվեստով ըստ արժանվույն ներկայացնել Արցախի մշակույթը: Նա միշտ էլ աչքի է ընկել իր բարձր պրոֆեսիոնալիզմով և այս երեկոն, որ կազմակերպել ենք ի պատիվ Վ. Գասպարյանի, մի յուրօրինակ ինքնախոստովանություն է, որ մենք արվեստագետի այս տեսակը մեզանում պահելու խնդիր ունենք: Մենք ուրախ ենք, որ նա շարունակում է ազնիվ ծառայությամբ իր ներդրումը բերել մեր հայրենի մշակույթին՝ իր անձնական օրինակով կրթել ու դաստիարակել սերունդներին: Նա փայլուն և տաղանդավոր երաժիշտ է: Մենք շնորհակալ ենք նրան իր տեսակի, իր վաստակի համար»,-մասնավորապես ասել է Ն. Աղաբալյանը:
Ստեփանակերտի Սայաթ-Նովայի անվան երաժշտական քոլեջի տնօրեն Կարինե Դադամյանը ևս շնորհավորելով հոբելյարի 70-ամյակը, իր խոսքում նշել է. «Մեծ արվեստագետ Վ. Գասպարյանի տաղանդը գեներով փոխանցվել է որդուն՝ Կարեն Գասպարյանին: Ես հպարտ եմ, որ ժամանակին ունեցել եմ այսպիսի աշակերտ, որի արվեստով մենք այսօր հիացանք: Վ. Գասպարյանը ընկերասեր, բարի անձնավորություն է, անչափ հետաքրքիր է նրա հետ շփվելը ցանկացած թեմայի շուրջ: Արցախի երաժշտական կյանքում, մասնավորապես բազմաթիվ սերունդներ դաստիարակելու ասպարեզում, նրա ունեցած ներդրումը և վաստակը հայտնի է բոլորին»:
Միջոցառմանը ներկա էին ԱՀ նախագահ Բակո Սահակյանը, ԱԺ նախագահ Աշոտ Ղուլյանը, պաշտոնատար այլ անձինք, հոբելյարի հարազատներ, երաժիշտներ և այլք:
