Ադրբեջանի իշխող ընտանիքն ու այլ բարձրաստիճան պաշտոնյաներ հմտորեն թաքցնում են իրենց պատկանող մի քանի տասնյակ ընկերություններ:
Ադրբեջանի իշխող ընտանիքը թաքցնում է իր տասնյակ բիզնեսներ․ լրագրողական հետաքննություն
ՍՏԵՓԱՆԱԿԵՐՏ, մարտի 28, ԱՐՑԱԽՊՐԵՍ:Այդ մասին ասվում է ադրբեջանցի լրագրող Խադիջա Իսմայիլովայի համահեղինակած հետաքննական հոդվածում, հաղորդում է «Ազատությունը»:
Նշվում է, որ հանրությանը քաջ հայտնի, ակտիվորեն գործող, սակայն պետական գրանցամատյանում բացակայող ընկերությունների մեծ մասը պատկանում է նախագահական ընտանիքին:
Հետաքննությունը պարզել է, որ չգրանցված 29 ընկերություններից 10-ը «Փաշա Հոլդինգ»-ի դուստր ձեռնարկություններ են: Հոդվածագիրը հիշեցնում է, որ «Փաշա Հոլդինգ»-ի բաժնետոմսերի մի մասը պատկանում է Ադրբեջանի նախագահ Իլհամ Ալիեւի դուստրերին՝ Արզուին եւ Լեյլային, մյուս մասը՝ նրանց պապին՝ առաջին տիկին եւ առաջին փոխնախագահ Մեհրիբան Ալիեւայի հորը՝ Արիֆ Փաշաեւին:
«Փաշա Հոլդինգ»-ի եւ դրա կազմի մեջ մտնող ընկերությունների վերաբերյալ տեղեկությունները գաղտնի են նաեւ Ադրբեջանի հարկերի նախարարության բազայում: Պետական այդ մարմինը, ինչպես նաեւ «Փաշա Հոլդինգ»-ը պատճառների մասին «Ազատության» հարցումները թողել են անպատասխան:
Մինչդեռ ընկերության կայքէջում ընդգծվում է «Փաշա Հոլդինգ»-ի «նվիրվածությունը թափանցիկությանը», որի «օրինակ է փորձում այն ծառայել»:
Հանրությունից թաքցվող՝ Ալիեւի ընտանիքին պատկանող ընկերությունների մասին հայտնի դարձավ, երբ Եվրոպայի խորհրդի հակակոռուպցիոն մարմինը՝ GRECO-ն, հրապարակեց հերթական զեկույցը, որում Բաքվին մեղադրում էր պաշտոնատար անձանց ունեցվածքի թափանցիկության մեխանիզմը կյանքի կոչելու պարտավորություններից խուսափելու մեջ:
Նախկինում, ինչպես նշում են հոդվածագիրները, հարկային նախարարությունը որոշ պարտադիր տվյալներ էր պահանջում ընկերություններից՝ հասցե, գրանցման թվական, հարկատուի անձնական տվյալներ եւ այլն: Հենց այդ տվյալների շնորհիվ ադրբեջանցի լրագրողները բացահայտեցին իշխող ընտանիքի մութ գործարքները: Աղմկահարույց այդ հոդվածների հրապարակումից հետո օրենքը փոփոխության ենթարկվեց՝ այն այժմ ընկերություններից չի պահանջում բացահայտել սեփականատիրոջը:
Հիշեցնենք՝ «Ազատություն» ռադիոկայանի լրագրող Խադիջա Իսմայիլովան 17 ամիս բանտում անցկացրեց ֆինանսական բնույթի մեղադրանքներով, սակայն նա եւ նրա աջակիցները պնդում էին, որ իշխանությունները վրեժխնդիր են լինում լրագրողից կոռուպցիան բացահայտող հաղորդումների համար, որտեղ ներգրավված էին նաեւ Ալիեւը եւ նրա ընտանիքի անդամները: