Հայ բարեգործական ընդհանուր միության (ՀԲԸՄ) եվրոպական շուրջ տասը երկրներից պատվիրակության անդամները, ովքեր Արցախ են ժամանել ՀԲԸՄ «Եվրոպան հանուն Արցախի» ծրագրի շրջանակներում, երեկ՝ ապրիլի 22-ին, Ստեփանակերտում հանդիպել է հասարակական կազմակերպությունների ներկայացուցիչների հետ:
ՀԲԸՄ պատվիրակությունը Ստեփանակերտում հանդիպել է ՀԿ-ների ներկայացուցիչներին
ՍՏԵՓԱՆԱԿԵՐՏ, 23 ապրիլի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ ՀԿ ներկայացուցիչների հետ ՀԲԸՄ պատվիրակության անդամները քննարկել են փոխգործակցության հարցեր, հետաքրքրվել են առկա հիմնախնդիրներով, զրուցել անելիքների ու ծրագրերի մասին: Հանդիպման ընթացքում ՀԲԸՄ պատվիրակության անդամները պատասխանել են նաև ՀԿ ներկայացուցիչներին հետաքրքրող հարցերին:
«Արցախպրես»-ի թղթակցի հետ զրույցում Հայ բարեգործական ընդհանուր միության եվրոպական գրասենյակի տնօրեն Նիկոլա Տավիտյանը ասել է, որ Արցախ այցի նպատակը ճանաչողական է, քանի որ պատվիրակության անդամների մի մասն առաջին անգամ է այցելում, և գործնական է, քանի որ տարբեր հանդիպումների ընթացքում փորձում են առանձնացնել այն հիմնական խնդիրները, որոնց շուրջ առաջիկայում կաշխատեն:
«Առաջին հերթին կակտիվացնենք մեր քարոզչական աշխատանքը, որպեսզի եվրոպական ավելի շատ կառույցների և հասարակական կազմակերպությունների ներկայացուցիչներ այցելեն Արցախ: Եվրոպայում Արցախը միակ չճանաչված պետությունն է, որի հետ համագործակցություն չկա: Մեզ համար շատ կարևոր է որպեսզի եվրոպացիները կոնկրետ տեղեկություններ և տպավորություններ ունենան, որ այստեղ մարդիկ ապրում և արարում են, ու որ Արցախը միայն հակամարտության գոտի չէ»,- ասել է Ն. Տավիտյանը:
Բելգիայի հայկական կազմակերպությունների ֆեդերացիայի ընդհանուր համակարգող Շահնուր Մինասյանն էլ ասել է, որ հակամարտության քողի ներքո Ադրբեջանի կողմից Արցախի նկատմամբ հումանիտար շատ լուրջ խախտումներ են իրականացվում:
«Այս ամենը պետք է ներկայացվի եվրոպական համապատասխան կառույցներին, և այս առումով մեզ լոբբիստական մեծ աշխատանք է սպասվում: Տեղեկատվական դաշտում ևս անելիքները մեծ են,-ասել է Շ. Մինասյանը և հավելել,- առայժմ ինֆորմացիայի հավաքագրման փուլում ենք: Հանդիպումներ ենք ունենում ԱՀ Ազգային Ժողովի, Կառավարության ներկայացուցիչների հետ. այս ամենը պետք է կանոնակարգենք, հայեցակարգ մշակենք, որպեսզի կարողանանք շարունակել մեր հետագա կոնկրետ քայլերը»: