Այսօր՝ ապրիլի 26-ին, կայացած նիստում ԱՀ Գործադիր մարմինը հաստատել է գարնանացան մշակաբույսերի ցանքաշրջանառության խթանման 2017 թվականի ծրագիրը:
Պետական ինչ աջակցություն կտրվի հողօգտագործողներին. ծրագիրն այսօր հաստատել է Կառավարությունը
ՍՏԵՓԱՆԱԿԵՐՏ, 26 ապրիլի, ԱՐՑԱԽՊՐԵՍ: ԱՀ գյուղատնտեսության նախարար Արամ Մխոյանը նշել է, որ այդ ծրագրով նախատեսվում է ձեռք բերել և պետական աջակցության տեսքով հողօգտագործողներին անհատույց տրամադրել արևածաղկի, հլածուկի, սոյայի, կտավատի, ոլոռի, սիսեռի, լոբու, եգիպտացորենի, հնդկացորենի և առվույտի սերմեր, համապատասխան հանքային պարարտանյութեր և ինոկուլյանտ (ախտահանիչ), բանջարեղենի մշակությամբ զբաղվող անձանց՝ 1 հեկտարի դիմաց անհատույց 200 000 ՀՀ դրամ կամ դրան համարժեք ապրանքանյութեր (նվազագույնը 0,5 հեկտարի համար), ծխախոտի մշակությունից ստացված բերքի իրացման դիմաց՝ 1 կիլոգրամի համար 10 ՀՀ դրամի չափով լրավճար:
Վարչապետ Արայիկ Հարությունյանը կարևորել է ցանքաշրջանառության կիրառումը գյուղատնտեսության զարգացման և գյուղմթերքի արտադրողականության բարձրացման գործում: Շրջվարչակազմերի ղեկավարների ուշադրությունը հրավիրելով ծրագրի վրա՝ վարչապետը հորդորել է վերահսկել, որպեսզի աշխատանքները ըստ ագրոկանոնների իրականացվեն: Նրա համոզմամբ՝ ճիշտ մշակված դաշտերում որակյալ բերքը երաշխավորված է:
