«Հայաստան» համահայկական հիմնադրամի Տորոնտոյի տեղական մարմնի և ԱՀ կառավարության համաֆինասավորմամբ այսօր տեղի է ունեցել Շուշիի մշակույթի և երիտասարդության կենտրոնի բացման արարողություն:
Շուշիում բացվել է մշակույթի և երիտասարդության կենտրոն
ՍՏԵՓԱՆԱԿԵՐՏ, 22 մայիսի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ միջոցառմանը բացման խոսքով հանդես է եկել ԱՀ մշակույթի և երիտասարդության նախարար Նարինե Աղաբալյանը, ով իր խոսքում նշել է, որ 1992 թվականից ի վեր Շուշին դարձել է, ոչ միայն արցախցիների, այլև համայն հայության հաղթանակի և հպարտության խորհրդանիշը:
«Մեր կատարածը լիարժեք չէր լինի, եթե մենք Շուշիին չվերադարձնեինք իր ազգային դիմագիծը: Շուշին նորից վերածնվեց ու վերստին դարձավ հոգևոր ու գիտամշակութային կենտրոն: 25 տարիներ ի վեր յուրաքանչյուր հայ այս գիտակցումով է մոտեցել Շուշիի վերականգնման հարցին. ավերակված Շուշիում կառուցել մշակույթի կենտրոններ, կրթական հաստատություններ և այլն,- մասնավորապես ասել է Ն. Աղաբալյանը և հավելել- այսօր մենք արդեն ունենք Շուշիի գեղեցիկ մշակույթի և երիտասարդության կենտրոն»:
Միջոցառմանը ներկա «Հայաստան» համահայկական հիմնադրամի գործադիր տնօրեն Արա Վարդանյանն ասել է, որ «Շուշի» խորագրով դրամահավաքի արդյունքում այստեղ իրականացվել են 4 փողոցների ասֆալտապատում, շուրջ 12 բնակելի շենքերի տանիքների վերանորոգում, ազգային գրադարանի և Եզնիկ Մոզյան արհեստագործական ուսումնարանի կառուցում:
«Մենք կփորձենք դահլիճի սարքավորումներով ևս օգնել: Մեր հիմնադրամն Արցախում և, մասնավորապես, Շուշիիում իրկանացվող ծրագրերին միշտ էլ սատարելու ենք»,-ասել է Ա. Վարդանյանը:
«Հայաստան» համահայկական հիմնադրամի Տորոնտոյի տեղական հանձնախմբի ատենապետ Մկրտիչ Մկրտչյանն էլ ասել է. «Ինձ համար մեծ պատիվ է լինել Շուշիում: Այս կետրոնի բացման առիթը մեզ ևս մեծ ուրախություն է պատճառել. չէ՞-որ այդ գործում մենք ևս մեր ներդրումն ունենք: Երազում եմ, որ Շուշին օրեցօր ավելի ծաղկի ու բարգավաճի»: Շուշիի մշակույթի և երիտասարդության կենտրոնի բացման պատիվը տրվել է Ն. Աղաբալյանին և Մկրտիչ Մկրտչյանին: Նոր դահլիճում համերգային ծրագրով հանդես է եկել «Մռակած» պետական կամերային երգչախումբ:
Միջոցառմանը ներկա էին «Հայաստան» համահայկական հիմնադրամի ներկայացուցիչներ, ԱՀ քաղաքաշինության նախարար Կարեն Շահրամանյանը, շուշեցիներ և այլք:
